நிறம் மாறும் பற்கள் - தடுப்பு வழிகள் யாவை?

‘டூத் ஒயிட்டனிங்’ சிகிச்சைக்குப் பதிலாக ஆண்டுக்கு ஒருமுறை ‘ஸ்கேலிங்’ என்ற முறையில் பற்களைச் சுத்தப்படுத்திக் கொள்ளலாம். 

‘ஸ்கேலிங்’ மூலம் பல்லில் காரை படிதல், நிறமிழத்தல் போன்ற பிரச்சினைகள் தவிர்க்கப்படும். இதற்கு ஒவ்வாமை ஏற்பட வழியில்லை. பற்கள் எளிதாக இயல்பு நிறத்துக்கு மாறும்.  

டென்டல் ஃபுளூரோசிஸ் பிரச்சினை உள்ளவர்கள் பல் மருத்துவர் ஆலோசனைப்படி ஃபுளூரைடு பற்பசைகளைப் பயன்படுத்த வேண்டும். 

புகைப் பழக்கம், புகையிலை போடுதல், குளிர்பானங்கள், கோலா பானங்கள் குடித்தல் ஆகியவற்றை அவசியம் தவிர்க்க வேண்டும். மது வேண்டவே வேண்டாம்.

சாக்லேட், இனிப்பு மாவு மற்றும் சர்க்கரை கலந்த இனிப்புகளைச் சாப்பிட்ட பிறகு வாயை நன்றாகக் கொப்பளியுங்கள். அல்லது காரட், ஏதாவது ஒரு பழம் சாப்பிடுங்கள்.

‘பளிச்’ பற்களுக்கான விளம்பரங்களைப் பார்த்து தினமும் புதிது புதிதாக பற்பசைகளை வாங்கிப் பயன்படுத்தாதீர். பல பற்பசைகளில் ‘பிளீச்சிங்’ ரசாயனங்களே உள்ளன.

‘பிளீச்சிங்’ ரசாயனங்களால்  சில நாட்களில் பற்கள் வெண்மையானதுபோல் தோன்றலாம். ஆனால், நாளடைவில் எனாமல் கரைந்து பற்கள் சேதமடையவே வாய்ப்பு அதிகம்.  

தினமும் இரண்டு முறை பல் துலக்க வேண்டும். மிருதுவான பல் துலக்கியில் பட்டாணி அளவுக்குப் பற்பசை கொண்டு ஐந்து நிமிடங்களுக்குப் பல் துலக்கினால் போதும்.   

அதிக நேரம் துலக்குவதாலோ, அழுத்தமாகத் துலக்குவதாலோ அதிக பற்பசை கொண்டு துலக்குவதாலோ பற்கள் வெள்ளை நிறத்துக்கு மாறிவிடாது.

ஜெல் பற்பசை மற்றும் பல்வேறு நிறங்களில் உள்ள பற்பசைகளைப் பயன்படுத்த வேண்டாம். வெள்ளை நிறத்தில் இருக்கும் பற்பசையை மட்டுமே பயன்படுத்துங்கள்.   

மருத்துவரின் பரிந்துரை இல்லாமல் நீங்களாகவே மருந்து, மாத்திரைகளை வாங்கிச் சாப்பிடாதீர்கள். | தகவல்கள்: பொதுநல மருத்துவர் கு.கணேசன்