நேபாள விமான விபத்தில் 23 பேர் பலி

நேபாளத்தில் பயணிகள் உட்பட 23 பேருடன் மாயமான விமானம் விபத்துக்குள்ளானது உறுதியானது. விமானத்தில் இருந்த அனைவரும் பலியாகினர்.

விமானம் விபத்துக்குள்ளானதை அந்நாட்டு சுற்றுலாத்துறை அமைச்சர் உறுதிப்படுத்தினார்.

முன்னதாக இன்று காலை விமானம் மாயமானவும் பொக்காரா விமான நிலைய அதிகாரி யோகேந்திர குவார் அளித்த பேட்டியில், "பொக்காரா விமான நிலையத்தில் இருந்து பயணிகள் உட்பட 23 பேருடன் தாரா ஏர்லைன்ஸுக்கு சொந்தமான சிறிய ரக விமானம் ஒன்று இன்று (புதன்கிழமை) காலை புறப்பட்டது. அங்கிருந்து 18 நிமிட தொலைவில் உள்ள ஜோம்சோம் விமான நிலையத்தை நோக்கி விமானம் பயணித்தது. ஆனால், விமானம் புறப்பட்ட சில விநாடிகளிலேயே கட்டுப்பாட்டு அறையுடன் தொடர்பை இழந்தது. மாயமான அந்த விமானம் விபத்துக்குள்ளாகியிருக்கலாம் என அஞ்சப்படுகிறது" என்றார்.

விமானத்தை தேடும் பணிகள் முடுக்கிவிடப்பட்ட நிலையில் மலைப்பகுதியில் விமானத்தின் நொறுங்கிய பாகங்கள் கண்டறிப்பட்டன. விமானம் விபத்துக்குள்ளானதை உறுதி செய்த சுற்றுலா அமைச்சர் 23 பேரும் இறந்ததாகவும் உறுதி செய்தார்.