சிரியாவில் ஐ.எஸ். கொலைவெறித் தாக்குதல்: 130 பேர் பலி

சிரியாவின் டமாஸ்கஸ் மற்றும் ஹாம்ஸ் நகரில் ஐ.எஸ். தீவிரவாதிகள் நடத்திய தொடர் குண்டு வெடிப்புத் தாக்குதல்களில் நேற்று 130 பேர்களுக்கும் மேல் பலியாகியிருக்கலாம் என்று அஞ்சப்படுகிறது.

உலக நாடுகள் போர் நிறுத்தம் இதோ வருகிறது, அதோ வருகிறது என்று கூறிவரும் நிலையில் நேற்று ஐ.எஸ். அமைப்பு கொலைவெறி குண்டுவெடிப்புத் தாக்குதலில் ஈடுபட்டது.

டமாஸ்கஸின் சயீதா ஸெய்னாப் புறநகர்ப்பகுதியில் தொடர் குண்டு வெடிப்புகள் ஏற்பட்டதில் 83 பேர் பலியாகினர். சுமார் 170 பேர் படுகாயமடைந்துள்ளனர்.

மதிய வேளையில் பள்ளிக்கு அருகில் நெரிசலான பகுதியில் அடுத்தடுத்து குண்டுகள் வெடித்ததாக சானா செய்தி நிறுவனம் தெரிவிக்கிறது.

அதே போல் ஹாம்ஸ் நகரில் வெடிகுண்டு தாக்குதலுக்கு 46 பேர் பலியானதாகவும், நிறைய பேர் காயமடைந்ததாகவும் சானா செய்தி கூறியுள்ளது.

இப்பகுதில் 2 கார்குண்டுகள் வெடித்ததில் எண்ணற்றோர் காயமடைந்ததாக அங்கிருந்து வரும் செய்திகள் தெரிவிக்கின்றன.