ஆப்கான் விமான நிலையம் அருகே தற்கொலைப்படை தாக்குதல்: ஒருவர் பலி, 13 பேர் படுகாயம்

ஆப்கானிஸ்தான் தலைநகர் காபூல் விமான நிலையம் அருகே தாலிபான் தீவிரவாதிகள் நடத்திய பயங்கர தற்கொலைப்படை தாக்குதலில் ஒருவர் பலியானார். மேலும் 13 பேர் படுகாயமடைந்துள்ளனர்.

காபூல் விமான நிலையம் அருகே காலை வேளையில் மர்ம நபர் ஒருவர் தான் உடலில் கட்டியிருந்த வெடிகுண்டை வெடிக்கச் செய்தார். இதில் ஒரு சிறிய ரக பேருந்து வெடித்துச் சிதறியது. இந்த தற்கொலைப்படைத் தாக்குதலில் ஒருவர் பலியானதாகவும் 13 பேர் காயமடைந்ததாக காபூல் போலீஸார் தெரிவித்தனர்.

தாலிபான் தீவிரவாதிகள் ஆப்கானின் பல்வேறு பகுதிகளில் தொடர் தாக்குதல்களை நடத்தி வருகின்றனர். கடந்த 11ஆம் தேதி அங்குள்ள ஸ்பெயின் தூதரகத்தின் விருந்தினர் மாளிகை மீது தற்கொலைப்படை தாக்குதல் நடத்தினர்.

இதனை அடுத்து பக்ராம் விமான தளம் அருகே தாலிபான்கள் நடத்திய தாக்குதலில் 6 அமெரிக்கா படை வீரர்கள் கொல்லப்பட்டனர்.