சவுதி அரேபியாவில் தீ விபத்து: ஒரு தமிழர் உட்பட 10 இந்தியர்கள் பலி

சவுதி அரேபியாவில் வீடு ஒன்றில் நடந்த தீ விபத்தில் ஒரு தமிழர் உட்பட10 இந்தியர்கள் பலியாகினர். 6 பேர் காயமடைந்தனர்.

சவுதி அரேபியாவிலுள்ள நஜ்ரன் நகரில் புதன்கிழமை இந்தியத் தொழிலாளர்கள் தங்கியிருந்த வீட்டில் தீவிபத்து ஏற்பட்டது. இதில் 10 பேர் பலியாகினர். 6 பேர் காயமடைந்து மருத்துவமனையில் சேர்க்கப்பட்டுள்ளனர். வீட்டில் உள்ள ஏசி இயந்திரத்தாலேயே இந்த விபத்து ஏற்பட்டுள்ளது. ஜன்னல்கள் இல்லாமல் இருந்ததே உயிரிழப்புக்கு காரணம் என்று கூறப்படுகிறது.

இது குறித்து வெளியுறவுத் துறை அமைச்சர் சுஷ்மா ஸ்வராஜ் தனது ட்விட்டர் பக்கத்தில், "சவுதி அரேபியாவில் நஜ்ரன் நகரத்தில் உள்ள வீடு ஒன்றில் நடந்த தீ விபத்தில் 10 இந்தியர்கள் பலியானதையும் 6 பேர் காயமடைந்து மருத்துவமனையில் அனுமதிக்கப்பட்டுள்ளதையும் நான் கேள்விப்பட்டேன்.

பாதிக்கப்பட்டவர்களுக்கு உதவ இந்திய தூதர அதிகாரிகளுக்கு அறிவுறுத்தப்பட்டுள்ளது" என்றார்.

உயிரிழந்தவர்களின் விவரம்:

முருகானந்தன் கலியன் - தமிழ் நாடு

தப்ரிக் கான், அதி அகமத், வாசிக் அக்ரம், வாகில் அகமத் - உத்தரப் பிரதேசம்

கவுரி சங்கர், குப்தா - பிஹார்

கமபாலன் சத்யன், பஜு ராகவன் - கேரளா