ஆப்கன்: இராக் தூதரகம் அருகே தற்கொலைப் படை தாக்குதல்

ஆப்கானிஸ்தானிலுள்ள இராக் தூதரகத்தின் அருகே தீவிரவாதிகளால் தற்கொலைப் படை தாக்குதலை நடத்தப்பட்டது.

இதுகுறித்து ஆப்கானிஸ்தான் அதிகாரிகள் தரப்பில், “ஆப்கானிஸ்தானின் தலைநகர் காபூலிலுள்ள இராக் தூதரகத்துக்கு வெளியே தீவிரவாதிகள் இன்று (திங்கட்கிழமை) தற்கொலைப் படை தாக்குதலை நடத்தினர். தூதரக கட்டிடத்துக்குள் உள்ளே இருந்த அனைத்து அதிகாரிகளும் பாதுகாப்பு படையினரால் பாதுகாப்பாக மீட்கப்பட்டனர். நான்கு தீவிரவாதிகள் இந்தத் தாக்குதலை நடத்தியுள்ளனர். தொடர்ந்து தீவிரவாதிகளுடம் பாதுகாப்புப் படையினர் சண்டையிட்டு வருகின்றனர்” என்று கூறப்பட்டுள்ளது.

இந்தத் தற்கொலைப் படை தாக்குதலில் பலியான மற்றும் காயமடைந்தவர்களின் தகவல் இதுவரை வெளியாகவில்லை.

இந்தத் தாக்குதலுக்கு ஐஎஸ் அமைப்பு பொறுப்பேற்றுள்ளது.