இரட்டை வெடிகுண்டு தாக்குதலுக்கு 44 பேர் பலி

சிரியாவில் ஐஎஸ் தீவிரவாதிகள் நேற்று நிகழ்த்திய இரட்டை வெடிகுண்டு தாக்குதலில் 44 பேர் கொல்லப்பட்டனர்.

இதுகுறித்து சனா செய்தி நிறுவனம் வெளியிட்ட அறிக்கை யில் கூறியிருப்பதாவது: நாட்டின் வடக்குப் பகுதியில் துருக்கி எல்லைக்கு அருகில் உள்ள காமிஷ்லி நகரில் மக்கள் நெரிசல் அதிகம் உள்ள பகுதியில் வெடிகுண்டு நிரப்பப்பட்ட லாரி வெடித்துச் சிதறியது. அடுத்த சில நிமிடங்களில் அதே பகுதியில் வெடிகுண்டுகளுடன் கூடிய மோட்டார் சைக்கிள் ஒன்றும் வெடித்தது.

இதனால் அங்கிருந்த பல கட்டிடங்கள் இடிந்து விழுந்தன. இதையடுத்து, அப்பகுதிக்கு விரைந்த சென்ற மீட்புக் குழுவினர் இடிபாடுகளில் சிக்கியவர்களை மீட்கும் பணியில் ஈடுபட்டனர். 44 பேரின் சடலங்கள் மீட்கப்பட்டன. மேலும் காயமடைந்த 10-க்கும் மேற்பட்டோர் மருத்துவமனையில் அனுமதிக்கப்பட்டனர். இந்தத் தாக்குதலுக்கு ஐஎஸ் அமைப்பு பொறுப்பேற்றுள்ளது.