கார் குண்டு தாக்குதலில் சிரியாவில் 51 பேர் பலி

சிரியாவின் வடக்கில் உள்ள அலெப்போ மாகாணத்தில் அல்-பாப் என்ற நகரம் உள்ளது. வடமேற்கு சிரியாவில் ஐ.எஸ். கட்டுப்பாட்டில் இருந்த கடைசி முக்கிய நகரம் இதுவாகும். இந்நகரை துருக்கி ஆதரவு கிளர்ச்சியாளர்கள் பல வார சண்டைக்குப் பிறகு நேற்று முன்தினம் மீட்டனர்.

இந்நிலையில் அல்-பாப் நகருக்கு வடகிழக்கே 8 கி.மீ. தொலைவில், சுசியன் என்ற கிராமத்தில் கிளர்ச்சியாளர்கள் நேற்று காலை, சாலையில் சோத னைப் பணி மேற்கொண்டிருந்தனர். சோதனைச் சாவடிக்கு அருகில் கிளர்ச்சியாளர்களின் 2 படைப் பிரிவுகள் முகாமிட்டிருந்தன.

இந்நிலையில் தீவிரவாதி ஒருவர் வெடிபொருள் நிரப்பிய காரை திடீரென சோதனைச் சாவடி மீது மோதி வெடிக்கச் செய்தார். இதில் 51 பேர் உயிரிழந்தனர். ஐ.எஸ். தீவிரவாதிகள் இத்தாக்குதலை நடத்தியிருக்கலாம் என கருதப் படுகிறது.