இந்த ஆட்டம் யாருக்காக…?

உலக அரங்கில் இரண்டு தலைவர்கள், மெல்ல வளர்ந்து கொண்டு வருகிறார்கள். ஒருவர் – சவுதி அரேபியாவின் முகமது பின் சல்மான். மற்றவர் – ஜப்பான் நாட்டுப் பிரதமர் ஷின்சோ அபே. இரு வாரங்களுக்கு முன்பு, வட கொரியப் பிரசினை தீவிரத்தின் உச்சியை எட்டியபோதுஉலகம் அரண்டு போனது உண்மை.ஆனால், நிதானத்துடன் காய் நகர்த்தி, நிலைமையைக் கட்டுக்குள் கொண்டு வந்ததில் பெரும் பங்கு, அபேவையே சேரும்.

சீனா, வட கொரியாவுடன் ஜப்பானுக்கு முழு உடன்பாடு ஏற்பட்டுவிடவில்லை. காரணம், கடந்த கால கசப்பான அனுபவங்கள். 1970-களில் ‘சென்காக்கு’ தீவைச் சுற்றி, எண்ணெய் வளம் இருப்பது தெரிந்தவுடன் சீனாவும் தைவானும்அந்தப் பகுதியை உரிமை கொண்டாடின.

ராணுவ பலம் மிக்க வல்லரசு என்பதால் சீனா, எதற்கும் அஞ்சாமல், அத்துமீறலில் இறங்கியது. ரஷ்யாவும் இந்த சச்சரவில் களம் இறங்கியது.

அதனால்தான், இப்பகுதியின் மீது ஓர் ஆண்டுக்கு, சராசரியாக, சுமார் 1200 வான்வழி அத்து மீறல்கள் நிகழ்கின்றன. இவற்றில் சுமார் 75% சீனா நடத்துவது. மீதம் 25%...? ரஷ்யாவின் கைங்கரியம். இது, ஜப்பான் அரசின் அதிகாரப்பூர்வ தகவல்.

எப்போது இந்தப் பிரச்சினை பூதாகாரமாக உருவெடுத்தது? 2012-ம் ஆண்டு, ‘சென்காக்கு’ தீவுப் பகுதியை, தேசிய மயமாக்கி அறிவித்தது ஜப்பான் அரசு. இதற்கு எதிராக சீன நாட்டில் பொதுமக்கள், கிளர்ந்து எழுந்தனர்.

தனது நாட்டு மக்களின் ‘இயற்கையான’ உணர்வுகளுக்கு மதிப்பளித்து, 2013-ல், ‘டயாயு’ தீவுப் பகுதியை, தனது பாதுகாப்பு அடையாள மண்டலமாக அறிவித்தது சீன அரசு. கடற்படையின் தீவிரக் கண்காணிப்பின் கீழ் கொண்டு வந்தது.

2017 மே மாதம். ‘சென்காக்கு’ (சீனாவின் ‘டயாயு’) ஆளில்லா தீவுப் பகுதியின் மீது, ஆளில்லா விமானத்தை (‘ட்ரோன்’) பறக்க விட்டது சீனா. பதிலடி கொடுக்கத் தயார் ஆனது ஜப்பான். கிழக்கு சீனக் கடலில் போர் மேகங்கள் சூழ்ந்தன. நல்ல வேளையாக, நேரடி சண்டை எதிலும் ஈடுபடாமல், அமைதி காத்தது ஜப்பான்.

இந்த நிலையில்தான், ஷின்சோ அபே, பிரமாதமான ஒரு முடிவெடுத்தார். இதன் விளைவாக முளைத்ததுதான், இரண்டு ஆண்டுகளாக நடைபெறாத, வட கொரியா – தென் கொரியா பேச்சு வார்த்தை. தன்னால்தான் இது சாத்தியம் ஆயிற்று என்று ‘கேமரா’ முன் நின்று கொண்டு, சுய தம்பட்டம் அடித்துக் கொள்கிறார் ட்ரம்ப்.

ஆனால் இதனை சாத்தியம் ஆக்கியது – ஷின்சோ அபே – ஜி ஜின்பிங் சந்திப்பு!தொடரும்..