பிளஸ் 1 மாணவர் சேர்க்கை இன்று தொடக்கம்

கரோனா பரவலால் இந்த ஆண்டு பள்ளிகள் திறப்பில் தாமதம் ஏற்பட்டுள்ளது. இணையவழியில் பாடங்கள் நடத்தப்பட்டு வருகின்றன.

இந்நிலையில், 1 முதல் 10-ம் வகுப்புகள் வரையான மாணவர் சேர்க்கைக்கு தமிழக அரசு அனுமதி அளித்தது. அதன்படி, அனைத்து பள்ளிகளிலும் கடந்த 17-ம் தேதி முதல் மாணவர் சேர்க்கை நடந்து வருகிறது. அரசுப் பள்ளிகளில் வழக்கத்தைவிட இந்த ஆண்டு கூடுதலாக மாணவ, மாணவிகள் சேர்ந்து வருகின்றனர்.

இந்நிலையில், பிளஸ் 1 வகுப்புக்கான மாணவர் சேர்க்கை இன்று (ஆகஸ்ட் 24) தொடங்குகிறது. இதற்காக அனைத்து மேல்நிலைப்பள்ளிகளிலும் உரிய முன்னேற்பாடுகள் செய்யப்பட்டுள்ளன.

மாணவர் சேர்க்கையின்போது அரசின் கரோனா தடுப்பு வழிகாட்டுதல்களை பள்ளிகள் கண்டிப்பாக பின்பற்ற வேண்டும் என்று பள்ளிக்கல்வித் துறை அறிவுறுத்தியுள்ளது.