டான்செட் நுழைவுத்தேர்வு தொடக்கம்

தமிழகத்தில் அரசு, அரசு உதவி, தனியார் பொறியியல் கல்லூரிகள் மற்றும் கலை அறிவியல் கல்லூரிகளில் உள்ளஎம்இ, எம்டெக் போன்ற முதுநிலை படிப்புகளில் சேர தமிழ்நாடு பொது நுழைவுத்தேர்வில் (டான்செட் ) தேர்ச்சி பெற வேண்டும்.

இத்தேர்வை அண்ணா பல்கலை. நடத்துகிறது. அதன்படி வரும் 2020-21-ம் கல்வியாண்டின் டான்செட் நுழைவுத் தேர்வுக்கான இணையதள விண்ணப்பப்பதிவு கடந்த ஜனவரி 7 முதல் பிப்ரவரி 4-ம் தேதி வரை நடைபெற்றது. தமிழகம் முழுவதும் 33,146 பேர் வரை தேர்வுக்கு விண்ணப்பித்திருந்தனர்.

இதையடுத்து டான்செட் தேர்வு நேற்று தொடங்கியது. முதல்நாளில் எம்பிஏ, எம்சிஏ படிப்புகளுக்கான தேர்வு மாநிலம் முழுவதும் 31 மையங்களில் நடைபெற்றது. சுமார் 14 ஆயிரம் பேர் வரை தேர்வை எழுதினர். தேர்வுகள் கடினமாக இருந்ததாக மாணவர்கள் தெரிவித்தனர். தொடர்ந்து எம்இ, எம்டெக், எம்ஆர்க் மற்றும் எம்.பிளான்படிப்புகளுக்கான தேர்வு இன்று (மார்ச் 1) நடைபெற உள்ளது.