மணிப்பூர் பொதுத்தேர்வு கேள்வித்தாள் வெளியான விவகாரத்தில் ஒருவர் கைது

மணிப்பூர் மாநில மேல்நிலைக் கல்வி வாரியம் சார்பாக 11-ம் வகுப்புக்கான பொதுத் தேர்வு பிப்ரவரி 17-ம் தேதி தொடங்கியது. முதல்நாள் மணிப்பூரி தேர்வு நடைபெற்றது. இதனைத் தொடர்ந்து ஆங்கிலம், இயற்பியல், வேதியியல், கணிதம், உயிரியல் ஆகிய பாடங்களுக்கானத் தேர்வு நடைபெற இருந்தது.

இந்நிலையில், தேர்வுக்கு முன்பாகவே அனைத்து பாடங்களுக்குமான கேள்வித்தாள்கள் வெளியானதால்,11-ம் வகுப்பில் உள்ள அனைத்து பிரிவுகளுக்குமான பொதுத் தேர்வு 20-ம்தேதி ரத்து செய்யப்பட்டது. இதற்கிடையே கல்வி வாரியம் சார்பாக காவல்துறையிடம் புகார் செய்யப்பட்டது. மேலும், கேள்வித்தாள்கள் வெளியான விவகாரம் தொடர்பாக விசாரணை நடத்த 3 பேர் கொண்ட கமிட்டியை வாரியம் நியமித்துள்ளது.

இந்நிலையில், தனியார் மேல்நிலைப் பள்ளியின் நிர்வாக அதிகாரியான சுந்தர்சந்த் என்பவரை சைபர் பிரிவு போலீஸார் நேற்று கைது செய்து விசாரித்து வருகின்றனர்.