தி.மலை அருகே கார் - பேருந்து மோதல் ஒரே குடும்பத்தை சேர்ந்த4 பேர் பரிதாப உயிரிழப்பு

சென்னை மாதவரம் கன்னியப்பன் தெருவைச் சேர்ந்தவர் சதீஷ்குமார்(68). லாரி டிரான்ஸ்போர்ட் உரிமையாளர். இவரது மனைவி சாந்தி(60), மகள் பத்மபிரியா(34), மருமகன் மென்பொருள் பொறியாளர் பால்(42), பேரன் ஆர்யா(12), பேத்தி மிருதுளா(8). இவர்கள், அனைவரும் சுப நிகழ்ச்சியில் பங்கேற்பதற்காக சென்னையில் இருந்து திருவண்ணாமலைக்கு காரில் நேற்று வந்தனர். காரை, பால் ஓட்டி வந்துள்ளார்.

திருவண்ணாமலை அடுத்த ஊசாம்பாடி என்ற இடத்தில் சென்றபோது, எதிரே வந்த அரசுப் பேருந்தும் காரும் நேருக்கு நேர் மோதிக்கொண்டன. இந்த விபத்தில் பால், பத்மபிரியா, சாந்தி ஆகியோர் சம்பவ இடத்திலேயே உயிரிழந்தனர். சதீஷ்குமார், ஆர்யா, மிருதுளா ஆகியோர் பலத்த காயமடைந்தனர். மேலும், கார் மீது மோதிய அரசுப் பேருந்து, சாலையோர பள்ளத்தில் கவிழ்ந்தது. அதில், பயணம் செய்த 30-க்கும் மேற்பட்ட பயணிகள் காயமடைந்தனர்.

சம்பவ இடத்துக்கு வந்த போலீஸார் காரில் வந்த சதீஷ்குமார் உட்பட 3 பேரை மீட்டு, திருவண்ணாமலை அரசு மருத்துவக் கல்லூரி மருத்துவமனைக்கு அனுப்பிவைத்தனர். இதேபோல், பேருந்தின் கண்ணாடிகளை உடைத்துஅதிலிருந்த பயணிகளையும் மீட்டு, சிகிச்சைக்காக அனுப்பி வைத்தனர். இந்நிலையில் சிகிச்சை பலனின்றி சதீஷ்குமார் உயிரிழந்தார்.

இதனால் உயிரிழந்தோர் எண்ணிக்கை 4-ஆக உயர்ந்துள்ளது இதையடுத்து ‘பொக்லைன்' இயந்திரம் வரவழைக்கப்பட்டு, இடிபாடுகளில் சிக்கிய கார் அப்புறப்படுத்தப்பட்டது. மேலும், சாலையோரத்தில் கவிழ்ந்த அரசுப் பேருந்தும் மீட்கப்பட்டது. காரில் இருந்த தங்க நகைகளை போலீஸார் பத்திரமாக மீட்டனர்.