புதுச்சேரி கலை, அறிவியல் கல்லூரிகளில் மாணவர்கள் சேர்க்கை தொடக்கம் :

புதுச்சேரியில் கலை, அறிவியல் கல்லூரிகளில் மாணவர்கள் சேர்க்கை நேற்று தொடங்கி வரும் நவம்பர் 8-ம் தேதி வரை நடக்கிறது.

சென்டாக்கில் நீட் மதிப்பெண் அல்லாத படிப்புகளுக்கு 10,684 மாணவர்கள் விண்ணப் பித்திருந்தனர். இவர்களுக்கான மெரிட் லிஸ்ட் கடந்த மாதம் 24-ம் தேதி வெளியிடப்பட்டு, ஆட்சேபணைகள் வரவேற்கப்பட்டன. அனைத்து பரிசீலனையும் முடிந்து இறுதிக்கட்ட மெரிட் லிஸ்ட் கடந்த 14-ம் தேதி வெளியிடப்பட்டது. கலை, அறிவியல் படிப்புகளுக்கு விண்ணப்பித்த மாணவர்களுக்கு முதல்கட்டமாக கம்யூட்டர் மூலம் கலந்தாய்வு நடத்தப்பட்டு இடங்கள் ஒதுக்கீடு செய்யப்பட்டுள்ளது. இடம் கிடைத்த மாணவர்களின் பட்டியல் www.centacpuducherry.in என்ற இணையதளத்தில் வெளியிடப்பட்டது.

முதல்கட்ட கலை, அறிவியல் படிப்புகளுக்கான கலந்தாய்வில் மொத்தமுள்ள 4,260 இடங்களில் 4,170 இடங்களுக்ளு ஒதுக்கீடு செய்யப்பட்டுள்ளது. இடம் கிடைத்த மாணவர்களுக்கான ஆணை கடந்த 25-ம் தேதி இணையத்தில் வெளியானது. இதையடுத்து நேற்று காலை முதல் சம்பந்தப்பட்ட கல்லூரிகளில் மாணவர்கள் ஆர்வமுடன் சேரத் தொடங்கியுள்ளனர். புதுச்சேரி பாரதிதாசன் அரசு மகளிர் கலைக் கல்லூரி, தாகூர் கல்லூரி உட்பட அனைத்து கல்லூரிகளிலும் சேர்க்கைக்காக தங்களுடைய ஆணையுடன் வந்திருந்தனர். மாணவர்கள் சேர்க்கை வரும் நவம்பர் 8-ம் தேதி வரை நடக்கிறது.