வண்ணத்துப்பூச்சி பூங்காவுக்கு பார்வையாளர் வருகை அதிகரிப்பு :

கரோனா கட்டுப்பாடுகள் காரணமாக பல மாதங்களாக மூடப்பட்டிருந்த ரங்கம் வண்ணத்துப்பூச்சி பூங்கா அண்மையில் திறக்கப்பட்டது. எனினும், அதற்குப் பிறகு மிகக் குறைந்த எண்ணிக்கையிலேயே பார்வையாளர்கள் வந்து சென்றனர்.

இந்த சூழலில் ஆயுதபூஜை, சரஸ்வதி பூஜை, மிலாது நபி உள்ளிட்ட பண்டிகை கால விடுமுறை தினங்கள் வந்ததால், கடந்த 4 நாட்களாக குழந்தைகள், பெரியவர்கள் என பார்வையாளர்களின் எண்ணிக்கை அதிகரித்துள்ளது.

இதுகுறித்து வனத்துறை அதிகாரிகள் கூறும்போது, ‘‘கரோனா கட்டுப்பாடுகள் அமல்படுத்தப்பட்டதற்குப் பின் தினமும் சுமார் 200 பார்வையாளர்கள் மட்டுமே வந்து சென்றனர்.

தற்போது பண்டிகை கால விடுமுறை என்பதால் கடந்த 14-ம் தேதி 405 பேர், 15-ம் தேதி 549 பேர், 16-ம் தேதி 707 பேர், 17-ம் தேதி 1,286 பேர் என படிப்படியாக அதிகரித்து வருகிறது’’ என்றனர்.