தமிழகத்தில் தூய்மைப் பணியாளர் நிலை மோசமாக உள்ளது : தேசிய தூய்மைப் பணியாளர் ஆணையத் தலைவர் குற்றச்சாட்டு

தமிழகத்தில் தூய்மைப் பணியாளர்களின் நிலை மோசமாக உள்ளது என தேசிய தூய்மைப் பணியாளர் ஆணையத் தலைவர் தெரிவித்துள்ளார்.

உதகையில் தூய்மைப் பணியாளர்கள் வசிக்கும் பழைய உதகை மற்றும் காந்தல் பகுதிகளை தேசிய தூய்மைப் பணியாளர் ஆணையத் தலைவர் எம்.வெங்கடேசன் நேற்று ஆய்வு செய்தார். இதையடுத்து, தமிழகம் விருந்தினர் மாளிகையில் மாவட்ட வருவாய் அலுவலர் கீர்த்தி பிரியதர்சினி தலைமையில் நடைபெற்ற அதிகாரிகள் ஆய்வுக் கூட்டத்தில் பங்கேற்றார். பின்னர், செய்தியாளர்களிடம் அவர் கூறியதாவது:

தூய்மைப் பணியாளர்கள் வசிக்கும் இடங்கள் மோசமாக உள்ளன. கதவுகள் இல்லை, கழிப்பிடம் இல்லை, சாலை பராமரிக்கப்படவில்லை. இந்நிலையில், உதகைக்கு எப்படி ‘சிறந்த நகராட்சி’ என்ற விருது கொடுத்தார்கள் என்று தெரியவில்லை.

தூய்மைப் பணி ஒப்பந்த அடிப்படையில் வழங்கப்படுவதால், பணியாளர்கள் பல இன்னல்களுக்கு ஆளாகின்றனர். நாடு முழுவதும் தூய்மைப் பணிகள் ஒப்பந்த அடிப்படையில் வழங்கப்படுவதை ரத்து செய்ய வேண்டும்.

தமிழகத்தில் தூய்மைப் பணி ஒப்பந்த முறையை ஒழிக்க வேண்டும் என்று தமிழக முதல்வருக்கு கடிதம் எழுதியுள்ளோம். தூய்மைப் பணியை ஏன் ஒப்பந்த அடிப்படையில் வழங்க வேண்டும். தூய்மைப் பணியாளர்களின் உழைப்பை சுரண்டிக் கொண்டு ஒப்பந்ததாரர்கள் லாபம் அடைகின்றனர்.

கர்நாடகாவில் தூய்மைப் பணியாளர்கள் ஒப்பந்த அடிப்படையில் நியமிக்கப்படுவது இல்லை. அதேபோல் நிரந்தரப் பணியாளர்களாகவும் நியமிப்பது இல்லை. அந்தந்த நகராட்சியே தூய்மைப் பணியாளர்களுக்கு மாதம் ரூ.18 ஆயிரம் ஊதியம் வழங்குகின்றன. இந்த முறையை எல்லா மாநிலங்களும் பின்பற்ற தேசிய ஆணையம் பரிந்துரை செய்யும். முறையாக சம்பளம் வழங்காமல் தூய்மைப் பணியாளர்களை துன்புறுத்தும் ஒப்பந்ததாரர்களை பிளாக் லிஸ்ட்டில் வைத்து அவர்களது ஒப்பந்தத்தை ரத்து செய்யலாம்.

இதுவரை 7 மாநிலங்களுக்குச் சென்றுள்ளேன். இதில், தமிழகத்தில்தான் தூய்மைப் பணியாளர்களின் நிலை மோசமாக உள்ளது. தென்னிந்தியாவில் தூய்மைப் பணியாளர்கள் தங்கள் குறைகளைச் சொல்ல முன் வருவதில்லை. ஆனால், வட இந்தியாவில் தமக்கு இழைக்கப்படும் அநீதிகளை தைரியமாக சொல்கிறார்கள். தூய்மைப் பணியாளர்களை துன்புறுத்தும் ஒப்பந்ததாரர்களின் ஒப்பந்தத்தை ஜனாதிபதி வரை கூட சென்று ரத்து செய்வோம்.

இவ்வாறு அவர் கூறினார்.