அரசு பள்ளிகளில்சிறப்பாசிரியர் பணியிடம் நிரப்ப ஆக.27-ல் தேர்வு

அரசு உயர்நிலை, மேல்நிலைப்பள்ளிகளில் 1,598 சிறப்பாசிரியர் பணியிடங்களை நிரப்புவதற்கான போட்டித் தேர்வு ஆகஸ்ட் 27-ம் தேதி இணையவழியில் நடத்தப்படும்.

இதற்கான ஆன்லைன் பதிவு மார்ச் 31-ல் தொடங்கும் என்று ஆசிரியர் தேர்வு வாரியம் அறிவித்துள்ளது.

இதுதொடர்பாக ஆசிரியர் தேர்வு வாரியத்தின் தலைவர் எல்.நிர்மல்ராஜ் வெளியிட்டுள்ள அறிவிப்பில் கூறப்பட்டு இருப்பதாவது:

பள்ளிக்கல்வித் துறையில் 1,598 சிறப்பாசிரியர் பணியிடங்களை (ஓவியம்-365, உடற்கல்வி-801, இசை-91, தையல்-341) நிரப்புவதற்கான போட்டித் தேர்வு ஆகஸ்ட் 27-ம் தேதிநடத்தப்படும்.

இது இணைய வழியில் நடைபெறும். இதற்கான ஆன்லைன் பதிவு மார்ச் 31-ம் தேதி தொடங்கி ஏப்ரல் 25-ம் தேதி நிறைவடையும்.

ஒவ்வொரு பாடத்துக்கும் அடிப்படை கல்வித் தகுதியுடன் தொழில்நுட்பத் தகுதியும் நிர்ணயிக்கப்பட்டுள்ளது. வயது வரம்பு பொதுப்பிரிவினருக்கு 40. பிசி, பிசி-முஸ்லிம், எம்பிசி, எஸ்சி,எஸ்டி ஆகிய இடஒதுக்கீட்டுப் பிரிவினருக்கும் ஆதரவற்ற விதவைகளுக்கும் வயது வரம்பில் 5 ஆண்டுகள் தளர்வு அளிக்கப்படும்.

எழுத்துத் தேர்வுக்கு 95 மதிப்பெண். வேலைவாய்ப்பு அலுவலக பதிவுமூப்புக்கு 5 மதிப்பெண் வழங்கப்படும். இடஒதுக்கீட்டுப் பிரிவு வாரியான காலியிடங்கள், நிர்ணயிக்கப்பட்டுள்ள கல்வி, தொழில்நுட்பத் தகுதிகள், தேர்வுமுறை உள்ளிட்ட விவரங்களை ஆசிரியர் தேர்வு வாரியத்தின் இணையதளத்தில் (www.trb.tn.nic.in) இருந்து அறிந்து கொள்ளலாம்.

இவ்வாறு ஆசிரியர் தேர்வு வாரியத்தின் தலைவர் எல்.நிர்மல்ராஜ் வெளியிட்டுள்ள அறிவிப்பில் கூறப்பட்டுள்ளது.