தென்காசி காசி விஸ்வநாதர் கோயிலில் ஐப்பசி திருக்கல்யாண திருவிழா கொடியேற்றம்

தென்காசியில் உள்ள உலகம்மன் உடனுறை காசி விஸ்வநாத சுவாமி கோயிலில் ஐப்பசி திருக்கல்யாண திருவிழா நேற்று கொடியேற்றத்துடன் தொடங்கியது. அதிகாலை 5.40 மணிக்கு மேல் 6.20 மணிக்குள் கொடியேற்றம் நடைபெற்றது. கரோனா பரவல் காரணமாக பக்தர்களின்றி கொடியேற்றம் நடைபெற்றது.

வருகிற 13-ம் தேதி வரை திருவிழா நடைபெறுகிறது. விழா நாட்களில் உற்சவர் வீதியுலா நடத்தாமல் கோயிலுக்குள்ளேயே தினமும் உற்சவர் புறப்பாடு நடத்தப்படுகிறது. தினமும் காலை 10 மணியளவில் மண்டகப்படி அபிஷேகமும், பகல் 12 மணியளவில் உச்சிகால பூஜையும், இரவு 7 மணிக்கு மண்டகப்படி தீபா ராதனையும் செய்யப்படுகிறது. சுவாமி, அம்பாள் அனைத்து தினங்களிலும் பூங்கோயில் என அழைக்கப்படும் ஏகசிம்மாசன வாகனத்தில் அலங்காரங்கள் செய்யப்பட்டு, கோயில் வளாகத்தில் மட்டும் பிரகார வலம் நடைபெறுகிறது.

வருகிற 9-ம் தேதி தேரோட் டம் நடத்துவதற்கு பதிலாக பஞ்சமூர்த்திகளான விநாயகர், சுப்பிரமணியர், சுவாமி, அம்பாள், சண்டிகேஸ்வரர் ஆகிய உற்சவ மூர்த்திகள் மூஷிகம், மயில், கேடயசப்பரம், பூங்கோயில் மற்றும் மேனா ஆகிய வாகனங்களில் காலை 9 மணியளவில் கோயிலுக்குள் பிரகார வலம் வரும் நிகழ்ச்சி நடைபெறும்.

வருகிற 11-ம் தேதி கோயிலுக்குள் அமைந்துள்ள ராஜகோபுரத்தை அடுத்துள்ள புல்வெளியில் அம்பாள் தபசுக் காட்சியும், மாலை 6 மணிக்கு தபசு இருக்கும் அம்மனுக்கு சுவாமி காட்சி தரும் நிகழ்ச்சியும், இரவு 7 மணிக்கு மேல் சுவாமி, அம்பாள் திருக்கல்யாண வைபவமும் நடைபெறுகிறது. 12-ம் தேதி ஊஞ்சல் உற்சவம் கோயிலுக்குள் நடைபெறுகிறது.