நகர்புற உள்ளாட்சி தேர்தலுக்கு : நாளை முதல் விருப்ப மனுக்கள் : அமைச்சர் எ.வ.வேலு அறிவிப்பு :

தி.மலை மாவட்டத்தில் நகர் புற உள்ளாட்சித் தேர்தலுக்கான விருப்ப மனுக்கள், திமுக சார்பில் (21-ம் தேதி) நாளை முதல் வழங்கப்படும் என மாவட்ட திமுக செயலாளரும், பொதுப்பணித் துறை அமைச்சருமான எ.வ.வேலு தெரிவித்துள்ளார்.

இதுகுறித்து அவர் வெளியிட்டுள்ள அறிக்கையில், “தி மலை, ஆரணி, செய்யாறு மற்றும் வந்தவாசி ஆகிய 4 நகராட்சிகள் மற்றும் கீழ்பென்னாத்தூர், வேட்டவலம், செங்கம், புதுப்பாளையம், போளூர், களம்பூர், கண்ணமங்கலம், தேசூர், பெரணமல்லூர், சேத்துப்பட்டு ஆகிய 10 பேரூராட்சிகளுக்கு நகர் புற உள்ளாட்சித் தேர்தல் நடைபெற உள்ளது. இத்தேர்தலில் திமுக சார்பில் விருப்ப மனுக்கள் நாளை (21-ம் தேதி) முதல் வழங்கப்படும். மாவட்ட திமுக அலுவலகத்தில் ரூ.10 செலுத்தி விருப்ப மனுவை பெற்றுக் கொள்ளலாம். நகர்மன்ற உறுப்பினர் பதவிக்கு ரூ.5 ஆயிரமும், பேரூராட்சி மன்ற உறுப்பினர் பதவிக்கு ரூ.2,500-ம் செலுத்தவேண்டும். ஆதிதிராவிடர்கள் மற்றும் பெண்கள் 50 சதவீதம் செலுத்த வேண்டும். விண்ணப்பத்தை பூர்த்தி செய்து, கட்டணத் தொகையுடன் மாவட்ட திமுக அலுவலகத்தில் ஒப்படைக்க வேண்டும்” என தெரிவித்துள்ளார்.