தொடர் மழையால் வீடுகளில் முடங்கிய மக்கள் - வெள்ளக்காடான தூத்துக்குடி மாநகர் தெருக்கள் :

தூத்துக்குடி மாவட்டத்தில் கடந்த ஒருவாரமாக தொடர்ந்து மழை பெய்து வருகிறது. நேற்று முன்தினம் காலையில் தொடங்கிய மழை இரவிலும் நீடித்தது. நேற்று பகலிலும் தொடர்ந்து மழை பெய்துகொண்டே இருந்தது. தூத்துக்குடி மாநகரில் தாழ்வான பகுதிகளில் மழைநீர் தேங்கியது. பிரையண்ட் நகர், சிதம்பரநகர், அண்ணாநகர், டூவிபுரம், குறிஞ்சிநகர், ராஜீவ் நகர், முத்தம்மாள் காலனி, ஸ்டேட் பாங்க் காலனி, லூர்தம்மாள்புரம், ராஜகோபால் நகர் உள்ளிட்ட நகரின் பெரும்பாலான பகுதிகளில் முழங்கால் அளவுக்கு மழைநீர் தேங்கி நிற்கிறது.

மக்கள் வீடுகளை விட்டு வெளியே வர முடியாமல் முடங்கியுள்ளனர். திருச்செந்தூர் கந்தசஷ்டி சூரசம்ஹாரத்தை முன்னிட்டு தூத்துக்குடி மாவட்டத்துக்கு நேற்று உள்ளூர் விடுமுறை அறிவிக்கப்பட்டிருந்தது.

தெருக்கள், சாலைகளில் தேங்கிய மழைநீரை வெளியேற்றும் பணியில் மாநகராட்சி பணியாளர்கள் ஈடுபட்டனர். மாநகரின் பல்வேறு பகுதிகளில் 86 மின் மோட்டார்கள் மூலம் மழைநீரை வெளியேற்றும் பணி நடைபெற்று வருகிறது. மேலும், சுமார் 100 மின் மோட்டார்கள் தயார் நிலையில் வைக்கப்பட்டுள்ளன.

இதேபோல், நகரில் மழைநீர் அதிகம் தேங்கும் 25 இடங்களில் மழைநீர் சேமிப்பு தொட்டிகள் அமைத்து, ராட்சத மோட்டார் மூலம் தண்ணீரை வெளியேற்றும் வகையில் பம்பிங் ஸ்டேசன்கள் அமைக்கப்பட்டுள்ளன. இதில் 15 இடங்களில் மழைநீரை வெளியேற்றும் பணி நடைபெற்று வருகிறது. பல இடங்களில் நெல், வாழை மற்றும் மானாவாரி பயிர்கள் மழைநீரில் மூழ்கியுள்ளதால் விவசாயிகள் வேதனை அடைந்துள்ளனர். ஏரிகள், குளங்கள் வேகமாக நிரம்பி வருகின்றன.

மழை அளவு

அதி கனமழை பெய்ய வாய்ப்பு

வங்கக் கடலில் உருவாகியுள்ள புதிய காற்றழுத்த தாழ்வு பகுதி காரணமாக தூத்துக்குடி மாவட்டத்தில் அதிக மழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது. இதையடுத்து மாவட்டத்தில் மேற்கொள்ள வேண்டிய முன்னேற்பாடுகள் குறித்து அனைத்து துறை அதிகாரிகளுடன் ஆட்சியர் கி.செந்தில் ராஜ் ஆலோசனை நடத்தினார்.

அப்போது ஆட்சியர் பேசியதாவது: பொதுமக்களை பாதுகாப்பாக தங்க வைப்பதற்கு முகாம்களை அடிப்படை வசதிகளுடன் தயார் நிலையில் வைத்திருக்க வேண்டும். முதல்நிலை பொறுப்பாளர்களை பயிற்சி அளித்து தயார்படுத்த வேண்டும். மாவட்டத்தில் உள்ள 639 குளங்களையும் கண்காணிக்க வேண்டும். பயிர்கள், விவசாய பொருட்களை சேதம் ஏற்படாமல் பாதுகாக்க நடவடிக்கை மேற்கொள்ள வேண்டும். முகாம்களில் தங்க வைக்கப்பட்டுள்ள மக்களுக்கு உணவு பாதுகாப்பு துறை மூலம் தரமான உணவு அளிக்க வேண்டும். வழங்கல் துறையின் மூலம் அரிசி, பருப்பு உள்ளிட்ட அத்தியாவசிய பொருட்களை கையிருப்பில் வைத்துக்கொள்ள வேண்டும். டெங்கு உள்ளிட்ட வைரஸ் நோய்கள் பரவாமல் தடுக்க சுகாதாரத்துறை தேவையான நடவடிக்கைகள் எடுக்க வேண்டும் என்றார் ஆட்சியர்.