மானூர் ஒன்றியத் தலைவராக பொறியியல் பட்டதாரி பெண் தேர்வு :

திருநெல்வேலி மாவட்டம் மானூர் ஊராட்சி ஒன்றிய தலைவராக 22 வயது இளம் பொறியியல் பட்டதாரி லேகா போட்டியின்றி தேர்வு செய்யப்பட்டுள்ளார்.

திருநெல்வேலி மாவட்டத்தில் 9 ஊராட்சி ஒன்றியங்களில் ஊரக உள்ளாட்சி தேர்தல் கடந்த 6 மற்றும் 9-ம் தேதிகளில் 2 கட்டங்களாக நடைபெற்றது. கடந்த 20-ம் தேதி தேர்தலில் வெற்றி பெற்றவர்கள் பதவி ஏற்றனர்.

மாவட்ட ஊராட்சி தலைவர், ஊராட்சி ஒன்றிய தலைவர் ஆகிய பதவிகளுக்கு நேற்று தேர்தல் நடைபெற்றது. இதில் மானூர் ஊராட்சி ஒன்றியத் தலைவராக லேகா தேர்ந்தெடுக்கப்பட்டுள்ளார். திருநெல்வேலி மாவட்டத்தில் அதிக வார்டுகள் கொண்டது இந்த ஊராட்சி ஒன்றியம். இந்த ஒன்றியத்தில் மொத்தம் உள்ள 25 ஊராட்சி வார்டுகளில் திமுக கூட்டணி 16 இடங்களிலும், அதிமுக 3 இடங்களிலும் பாஜக ஓரிடத்திலும் சுயேச்சைகள் 5 இடங்களிலும் வெற்றி பெற்றிருந்தனர்.

இந்நிலையில் நேற்று நடைபெற்ற தேர்தலில் போட்டியின்றி ஊராட்சி ஒன்றிய தலைவராக திமுகவை சேர்ந்த லேகா தேர்ந்தெடுக்கப்பட்டார். ‘‘என்னுடைய பணி காலத்தில் மக்களின் அடிப்படை தேவைகளை பூர்த்தி செய்வேன்’’ என்று அவர் தெரிவித்தார். இவரது தந்தை அன்பழகன் மானூர் வடக்கு ஒன்றிய திமுக செயலாளராக உள்ளார்.