8-ம் வகுப்பு தேர்வு எழுதும் தனித்தேர்வர்கள் ஆன்லைன் மூலம் விண்ணப்பிக்கலாம் :

நவம்பர் மாதம் நடைபெறவுள்ள 8-ம் வகுப்பு பொதுத் தேர்வு எழுதும் தனித்தேர்வர்கள் ஆன்லைன் மூலம் விண்ணப்பிக்கலாம் என கிருஷ்ணகிரி மாவட்ட அரசுத் தேர்வுகள் துறை உதவி இயக்குநர் ராகினி தெரிவித்துள்ளார்.

இதுதொடர்பாக அவர் வெளியிட்டுள்ள செய்திக்குறிப்பு: தனித்தேர்வர்களுக்கான 8-ம் வகுப்பு பொதுத் தேர்வு வருகிற நவம்பர் மாதம் நடைபெறுகிறது. அதன்படி, நவம்பர் 8-ம் தேதி காலை 10 மணி முதல் 12 மணி வரை தமிழ் பாடத்திற்கும், 9-ம் தேதி ஆங்கிலம், 10-ம் தேதி கணிதம், 11-ம் தேதி அறிவியல், 12-ம் தேதி சமூக அறிவியல் ஆகிய பாடங்களுக்கும் தேர்வு நடைபெறுகிறது.

தேர்வில் பங்கேற்பவர்கள் 1.10.2021-ம் தேதி பனிரெண்டரை வயது பூர்த்தி அடைந்தவர்களாக இருத்தல் வேண்டும். வருகிற 11-ம் தேதி முதல் 18-ம் தேதி வரை (விடுமுறை நாட்கள் நீங்கலாக) காலை 10 மணி முதல் மாலை 5.45 மணி வரை www.dge.tn.gov.in என்கிற இணையதளத்தில் குறிப்பிட்டுள்ள சேவை மையங்களுக்கு நேரில் சென்று ஆன்லைன் மூலம் பதிவு செய்து கொள்ளலாம்.