நெல்லை, தென்காசி, குமரியில் மிதமான மழை :

திருநெல்வேலி மாவட்டத்தில் நேற்று முன்தினம் பரவலாக மழை பெய்தது. நேற்று காலை 8 மணி வரை 24 மணி நேரத்தில் மாவட்டத்தில் அதிகபட்சமாக ராதாபுரத்தில் 58 மி.மீ. மழை பதிவானது. மூலக்கரைப்பட்டியில் 55 மி.மீ., நம்பியாறு அணையில் 40, சேரன்மகாதேவியில் 37, அம்பா சமுத்திரத்தில் 35, கொடுமுடியாறு அணையில் 25, நாங்குநேரியில் 15, களக்காட்டில் 10.60, சேர்வலாறு, பாளையங்கோட்டையில் தலா 5, பாபநாசத்தில் 2, மணிமுத்தாறில் 1 மி.மீ. மழை பதிவானது.

பாபநாசம் அணைக்கு விநாடி க்கு 646 கனஅடி நீர் வந்தது. 505 கனஅடி நீர் வெளியேற்றப்பட்து. நீர்மட்டம் 86.80 அடியாக இருந்தது. மணிமுத்தாறு அணைக்கு விநாடிக்கு 64 கனஅடி நீர் வந்தது. அணையில் இருந்து நீர் வெளியேற்றப்படவில்லை. நீர்மட்டம் 63.65 அடியாக இருந்தது. சேர்வலாறு அணை நீர்மட்டம் 99.74 அடியாகவும், வடக்கு பச்சையாறு அணை நீர்மட்டம் 16.65 அடியாகவும், நம்பியாறு அணை நீர்மட்டம் 10.43 அடியாகவும், கொடுமுடியாறு அணை நீர்மட்டம் 10 அடியாகவும் இருந்தது.

இதேபோல், தென்காசி மாவட்டத்திலும் மழை பெய்தது. சிவகிரியில் 32 மி.மீ., ஆய்க்குடியில் 13, தென்காசியில் 7.60, குண்டாறு அணையில் 5, கடனாநதி அணை, ராமநதி அணை, செங்கோட்டையில் தலா 3, அடவிநயினார் அணையில் 2 மி.மீ. மழை பதிவானது.

கடனாநதி அணை நீர்மட்டம் 62.50 அடியாகவும், ராமநதி அணை நீர்மட்டம் 56.75 அடியாகவும், கருப்பாநதி அணை நீர்மட்டம் 52.50 அடியாகவும், அடவிநயினார் அணை நீர்மட்டம் 124.75 அடியாகவும் இருந்தது. குண்டாறு அணை தொடர்ந்து முழு கொள்ளளவில் இருந்தது.

நாகர்கோவில்

நேற்று பகலில் மழை நின்ற நிலையில் பேச்சிப்பாறை அணையில் இருந்து உபரிநீர் வெளியேற்றம் நிறுத்தப்பட்டது. நீர்மட்டம் 43 அடியாக உள்ளது. 827 கனஅடி தண்ணீர் உள்வரத்தாக வருகிறது. அணையில் இருந்து 378 கனஅடி தண்ணீர் வெளியேற்றப்படுகிறது. பெருஞ்சாணி அணையின் நீர்மட்டம் 66 அடியாக உள்ள நிலையில் விநாடிக்கு 725 கனஅடி தண்ணீர் வருகிறது.