கள்ளக்குறிச்சி, விழுப்புரம் மாவட்டங்களில் - மத்திய அரசை கண்டித்து விவசாயிகள் ஆர்ப்பாட்டம் :

கள்ளக்குறிச்சியில் அம்பேத்கர் சிலை அருகே இந்திய தொழிற் சங்க மையம்,அகில இந்திய விவசாயிகள் சங்கம், அகில இந்திய விவசாய தொழிலாளர்கள் சங்கம் சார்பில் நடைபெற்ற ஆர்ப்பாட்டத்திற்கு மாவட்டச் செயலாளர் ஏழுமலை தலைமை தாங்கினார். சின்னசேலம் புதிய பேருந்து நிலையம் அருகே விவசாய தொழிலாளர் சங்க வட்டத் தலைவர் கே.மூக்கன் தலைமையிலும், திருக்கோவிலூரில் ஏஐடியூசி மாவட்டச் செயலாளர் ஆ.வளர்மதி தலைமையிலும், கல்வராயன்மலை ஒன்றியம் வெள்ளிமலையில் தமிழ்நாடு விவசாயிகள் சங்கம் மற்றும் மலைவாழ் மக்கள் சங்க மாநில துணைத் தலைவர் வி.அண்ணாமலை தலைமையிலும் ஆர்ப்பாட்டம் நடைபெற்றது.

புதுச்சேரியில் ஆர்ப்பாட்டம்

இந்திய தொழிற்சங்க மையம்(சிஐடியூ), அகில இந்திய விவசாயிகள் சங்கம் (ஐகேஎஸ்), அகில இந்திய விவசாய தொழிலாளர்கள் சங்கத்தின் புதுச்சேரி குழுக்கள் சார்பில் மூன்று வேளாண் சட்டங்கள், மின்சார திருத்த சட்டம், தொழிலாளர் நலச்சட்ட திருத்தம், பெட்ரோல், டீசல், சமையல் எரிவாயு விலை உயர்வு, பொதுத்துறை நிறுவனங்கள் தனியார் மயம் போன்றவற்றை திரும்பப்பெற வலியுறுத்தி ஆர்ப்பாட்டம் நடத்தப்பட்டது. புதுவை அண்ணாசிலை அருகே நடந்த ஆர்ப்பாட்டத்தில் சிஐடியூ தலைவர் முருகன், ஐகேஎஸ் தலைவர் ராமமூர்த்தி, விவசாய தொழிலாளர் சங்கத் தலைவர் மணிபாலன் உட்பட பலர் கலந்துகொண்டனர்.

இதே கோரிக்கைகளை வலியுறுத்தி மதகடிப்பட்டு பேருந்து நிலையம், பாகூர் தேரடி வீதி, காரைக்கால் ஆகிய இடங்களிலும் போராட்டம் நடத்தினர்.