விருத்தாசலம் அருகே டாஸ்மாக் கடையில் - சுவரை துளையிட்டு மது பாட்டில்கள் திருட்டு :

விருதாச்சலம் அருகே டாஸ்மாக் கடையின் சுவரை மர்மநபர்கள் துளையிட்டு மதுபாட்டில்கள் திருடிச் சென்றுள்ளனர்.

விருத்தாசலத்தை அடுத்த பூவனூர் ஏனாதிமேடு கிராமத்தில் டாஸ்மாக் கடை இயங்கி வருகிறது. இந்த டாஸ்மாக் கடையில் நேற்று முன்தினம் இரவு வழக்கம் போல் கடையை பூட்டி விட்டு சென்றுள்ளனர்.

நேற்று காலை 10 மணிக்கு விற்பனையாளர் கடையை திறந்தபோது, கடையின் பின்பக்க சுவற்றில் துளையிட்டிருப்பதைக் கண்டுள்ளார்.

மேலும் கடையிலிருந்த 480 மதுபாட்டில் களையும் மர்ம நபர்கள் திருடிச் சென்றிருப்பது தெரியவந்துள்ளது.

இதையடுத்து விற்பனையாளர் செல்வராஜ் அளித்தப் புகாரின் பேரில் சம்பவ இடத்திற்கு சென்ற விருத்தாசலம் போலீஸார், வழக்குப் பதிவு செய்து விசாரணை நடத்தி வருகின்றனர்.