ஆசிரியரிடம் நகை பறித்த கும்பல் கைது :

காட்பாடியில் கத்தி முனையில் தனியார் பள்ளி ஆசிரியரிடம் நகையை பறித்துச் சென்ற 5 பேர் கொண்ட கும்பலை காவல் துறையினர் கைது செய்தனர்.

காட்பாடி வி.ஐ.டி பல்கலைக் கழகம் எதிரே உள்ள ராமதாஸ் நகரைச் சேர்ந்தவர் மனோகரன். தனியார் பள்ளி ஆசிரியர். கடந்த 1-ம் தேதி இரவு 9 மணியளவில் கடைக்குச் சென்று திரும்பிய இவரை மர்ம கும்பல் கத்தி முனையில் மிரட்டி மோதிரத்தை பறித்துச் சென்றது.

இதுகுறித்து, காட்பாடி காவல்நிலைய ஆய்வாளர் ஆனந்தன் வழக்குப்பதிவு செய்து விசாரித்து வந்தார். அங்கிருந்த கண்காணிப்பு கேமரா காட்சிகளை வைத்து விசாரித்து வேலூர் எஸ்.எஸ்.கே மானியம் பகுதியைச் சேர்ந்த அஜித்குமார் (25), ரமேஷ் (24), தோட்டப்பாளையத்தைச் சேர்ந்த அர்ஜுன் (24), சைதாப் பேட்டையைச் சேர்ந்த சமீர் (20) வசந்தபுரத்தைச் சேர்ந்த தனுஷ் (18) ஆகியோரை கைது செய்தனர். மேலும், தலைமறைவாக உள்ள இருவரை தேடி வருகின்றனர்.