காஞ்சி, செங்கை, திருவள்ளூர் மாவட்டங்களில் - பள்ளிவாசல்களில் பக்ரீத் சிறப்பு தொழுகை :

பக்ரீத்தை முன்னிட்டு காஞ்சிபுரம், செங்கல்பட்டு, திருவள்ளூர் மாவட்டங்களில் உள்ள பள்ளிவாசல்களில் நேற்று சிறப்பு தொழுகைகள் நடைபெற்றன.

காஞ்சிபுரம் தேரடி சுன்னத் ஜமாத் பள்ளிவாசலில் நேற்று காலை 8 மணிக்கு சிறப்புத் தொழுகை நடைபெற்றது. இதேபோல, ஹைதர்பேட்டை தெரு பள்ளிவாசல் உட்பட பல்வேறு முக்கிய பள்ளிவாசல்களில் சிறப்புத் தொழுகைகள் நடைபெற்றன. தொடர்ந்து முஸ்லிம்கள் குர்பானி கொடுத்தனர்.

காஞ்சிபுரம் மாவட்டத்தில் உத்திரமேரூர், பெரும்புதூர், வாலாஜாபாத் உள்ளிட்ட பகுதிகளிலும், செங்கல்பட்டு மாவட்டத்தில் செங்கல்பட்டு, தாம்பரம், மதுராந்தகம், செய்யூர் உள்ளிட்ட இடங்களிலும் உள்ள பள்ளிவாசல்களில் சிறப்புத் தொழுகைகள் நடைபெற்றன.

திருவள்ளூர் மாவட்டத்தில் திருவள்ளூர், திருத்தனி, பூந்தமல்லி, ஊத்துக்கோட்டை, ஆவடி, திருத்தணி, பள்ளிப்பட்டு, பொன்னேரி,கும்மிடிப்பூண்டி உள்ளிட்ட இடங்களில் உள்ள பள்ளிவாசல்களில் நடைபெற்ற சிறப்புத் தொழுகைகளில் முஸ்லிம்கள் ஏராளமானோர் பங்கேற்றனர். திருவள்ளூர் மாவட்டத்தில் கரோனா தொற்று நீங்க சிறப்பு பிரார்த்தனை நடைபெற்றது.