கரோனா நிவாரணம் பெற நாளைவரை டோக்கன் விநியோகம் : காஞ்சிபுரம் மாவட்ட ஆட்சியர் அறிவிப்பு

காஞ்சிபுரம் மாவட்டத்தில் பொதுமக்கள் கரோனா நிவாரண நிதி பெறுவதற்கு நாளை வரை (மே 12) டோக்கன் வழங்கப்படும் .

இது தொடர்பான ஆய்வுக் கூட்டம், மாவட்ட ஆட்சியர் அலுவலகத்தில் நேற்று நடைபெற்றது.இதில், பல்வேறுதுறை அதிகாரிகள் பங்கேற்றனர். தலைமை வகித்து மாவட்ட ஆட்சியர் மகேஸ்வரி பேசியதாவது:

காஞ்சிபுரம் மாவட்டத்தில் குடிமைப் பொருள் வழங்கல் திட்டத்தின் கீழ் மே 15-ம் தேதி முதல்அரிசி பெறும் குடும்ப அட்டைதாரர்களுக்கு, ரூ.2,000 கரோனா நிவாரண நிதி வழங்கப்படும். இதற்காக டோக்கன் வழங்கும் பணி தொடங்கப்பட்டுள்ளது. வரும் 12-ம் தேதி (நாளை) வரை டோக்கன் வழங்கப்படும். இதுகுறித்த பட்டியல் நியாயவிலைக் கடைகளில் ஒட்டி வைக்கப்படும். கூட்ட நெரிசலைத் தவிர்க்கும் வகையில், பயனாளிகளுக்கு வழங்கப்பட்டுள்ள டோக்கனில் தெரிவிக்கப்பட்டுள்ளதேதிகளில் சென்று, ஒரு மீட்டர் இடைவெளி விட்டு நின்று, நிவாரண நிதியைப் பெற்றுக் கொள்ளலாம் என்றார்.