அனுமதியில்லாமல் குழந்தைகள் இல்லம் நடத்தினால் ஓராண்டு சிறை தண்டனை : நாமக்கல் மாவட்ட ஆட்சியர் எச்சரிக்கை

அனுமதியின்றி குழந்தைகள் பராமரிப்பு இல்லம் வைத்து நடத்தினால் ரூ.1 லட்சம் அபராதத்துடன் ஓராண்டு சிறை தண்டனை விதிக்கப்படும், என நாமக்கல் மாவட்ட ஆட்சியர் கா.மெகராஜ் தெரிவித்தார்.

இதுதொடர்பாக அவர் வெளியிட்ட செய்திக்குறிப்பில் கூறியிருப்பதாவது:

குழந்தைகளை வைத்து பராமரிக்கும் அனைத்து இல்லங்களும் இளைஞர் நீதிச் சட்டம் 2015 பிரிவு 41-ன்படி பதிவு செய்யப்பட்ட பின்னரே நடத்த வேண்டும்.

அவ்வாறு பதிவு செய்யாமல் சட்டத்திற்கு புறம்பாக குழந்தைகள் இல்லங்கள் நடத்தினால் ரூ.1 லட்சம் அபராதத்துடன் 1 ஆண்டு சிறை தண்டனை விதிக்கப்படும்.

இதுதொடர்பாக மாவட்ட குழந்தைகள் பாதுகாப்பு அலுவலர், மாவட்ட குழந்தைகள் பாதுகாப்பு அலகு, இளங்கோ திருமண மண்டபம் அருகில், மோகனூர் சாலை, நாமக்கல் என்ற முகவரியில் நேரிலோ அல்லது 04286 -233103 என்ற தொலைபேசி எண்ணிலோ புகார் செய்யலாம்.

இதுபோல் 1098 என்ற சைல்டு லைன் இலவச தொலைபேசி எண்ணிலும் தகவல் அளிக்கலாம். தகவல் அளிப்போர் ரகசியம் பாதுகாக்கப்படும். இவ்வாறு தெரிவிக்கப்பட்டுள்ளது.