செங்கம் அருகே - விவசாயிகள் போராட்டம் :

செங்கம் அருகே எட்டு வழிச் சாலை திட்டத்தை எதிர்த்து முதல்வர் பழனிசாமிக்கு எதிராக நேற்று கருப்புக் கொடி காட்டும் போராட்டம் நடைபெற்றது.

சென்னை – சேலம் இடையே ரூ.10 ஆயிரம் கோடியில் எட்டு வழிச்சாலை திட்டத்தை அமல் படுத்த மத்திய, மாநில அரசுகள் முனைப்பு காட்டி வருகின்றன. இதற்கு, எதிர்ப்பு தெரிவித்து தி.மலை உட்பட 5 மாவட்ட விவசாயிகள் தொடர் போராட்டத்தில் ஈடுபட்டு வருகின்றனர். இந்நிலையில், தி.மலை மாவட்டத்தில் நேற்று நடைபெற்ற தேர்தல் பிரச்சாரத்தில் ஈடுபட்ட முதல்வர் பழனிசாமிக்கு எதிராக கருப்புக் கொடி காட்டப்பட்டுள்ளது. தி.மலையில் இருந்து செங்கத்துக்கு பிரச்சாரம் செய்ய முதல்வர் பழனிசாமி நேற்று மாலை சென்றார்.

அப்போது, செங்கம் அருகே உள்ள மண்மலை கிராமத்தில் மறைந்திருந்த விவசாயிகள் சிலர், கருப்புக் கொடி காட்டியுள்ளனர். அவர்கள், எட்டு வழிச்சாலை திட்டத்தை எதிர்த்தும், முதல்வர் பழனிசாமிக்கு எதிராகவும் கண்டன முழக்கங்கள் எழுப்பினர். இதையறிந்து பாதுகாப்பு பணியில் ஈடுபட்டிருந்த காவல்துறையினர் சென்றதும், கருப்பு கொடி காட்டியவர்கள் தப்பித்து சென்று விட்டனர். இதுதொடர்பாக, காவல்துறையினர், அங்கிருந்த சிலரை பிடித்து விசாரணை நடத்தி வருகின்றனர்.