தாம்பரம் சட்டப்பேரவை தொகுதி மண்டல தேர்தல் அலுவலர்களுக்கு பயிற்சி

தாம்பரம் சட்டப்பேரவைத் தொகுதியில் பணியாற்ற இருக்கும் மண்டலத் தேர்தல் அலுவலர்களுக்கு தாம்பரம் கோட்டாட்சியர் ரவிச்சந்திரன் தலைமையில் பயிற்சி வகுப்பு நேற்று முன்தினம் நடைபெற்றது.

தமிழக சட்டப்பேரவைத் தொகுதிகளுக்கான தேர்தல் நடைபெறுவதையொட்டி, தாம்பரம் சட்டப்பேரவைத் தொகுதியில் தேர்தல் பணியில் ஈடுபடும் மண்டல தேர்தல் அலுவலர்களுக்கான பயிற்சி வகுப்பு தாம்பரம் கோட்டாட்சியர் அலுவலகத்தில் நேற்று முன்தினம் தாம்பரம் கோட்டாட்சியரும், தாம்பரம் சட்டப்பேரவைத் தேர்தல் அலுவலருமான, ரவிச்சந்திரன் தலைமையில் நடைபெற்றது.

மண்டலத் தேர்தல் அலுவலர்கள், வாக்குச்சாவடி அலுவலர்களுக்கு பணி வழங்குவது, தேர்தல் விதிமுறைகளைக் கையாள்வது, மின்னணு வாக்குப்பதிவு இயந்திரங்களைக் கையாள்வது, கட்சி முகவர்கள், வாக்காளர்களை முறைப்படுத்துவது குறித்த விதிமுறைகள் எடுத்துக் கூறப்பட்டு பயிற்சி அளிக்கப்பட்டது.

மண்டல அலுவலர்கள், புதியதாக அமைக்கப்பட்டுள்ள மாறுதல் செய்யப்பட்டுள்ள வாக்குச்சாவடிகள் குறித்து அறிந்திருக்க வேண்டும் என்பன உள்ளிட்ட பல்வேறு அறிவுறுத்தல்கள் வழங்கப்பட்டன. இதில் தாம்பரம் வட்டாட்சியர் சரவணன், கோட்டாட்சியரின் நேர்முக உதவியாளர் பெருமாள் உள்ளிட்ட பல அலுவலர்கள் பங்கேற்றனர்.