கிருஷ்ணகிரி அணை நீர்மட்டம் சரிவு

கிருஷ்ணகிரி அணைக்கு நீர்வரத்து முற்றிலும் குறைந்த நிலையில், அணையின் நீர்மட்டம் நேற்று 48.85 அடியாக சரிந்தது.

தென்பெண்ணை ஆற்றின் நீர்பிடிப்புப் பகுதிகளில் மழை இல்லாததாலும், கெல வரப்பள்ளி அணையில் இருந்து நீர் திறப்பு குறைவாக உள்ளதாலும், கடந்த 2-ம் தேதி முதல் கிருஷ்ணகிரி அணைக்கு நீர்வரத்து முற்றிலும் நின்றது.

பாசனத்துக்காக அணையிலிருந்து தண்ணீர் திறக்கப்படுவதால், அணையின் நீர்மட்டம் படிப்படியாக குறைந்து வருகிறது.

நேற்று காலை அணையின் நீர்மட்டம் 48.85 அடியாக குறைந்தது.

அணையில் இருந்து 2-ம் போக சாகுபடிக்காக வலது மற்றும் இடதுபுறக் கால்வாய் வழியாக 162 கனஅடி தண்ணீர் திறந்துவிடப் பட்டுள்ளது.