காஞ்சி, செங்கை, திருவள்ளூர் மாவட்டங்களில் 9, 11-ம் வகுப்பு மாணவர்கள் பள்ளிக்கு வருகை

காஞ்சி, செங்கை, திருவள்ளூர் மாவட்டங்களில் உள்ள பள்ளிகளில் 9, 11-ம் வகுப்புகள் நேற்றுதொடங்கின. இதேபோல் கல்லூரிகளில் முதலாம் ஆண்டு, 2-ம் ஆண்டு வகுப்புகளும் தொடங்கின.

காஞ்சிபுரம் மாவட்டத்தில் 97 உயர்நிலை மற்றும் 137 மேல்நிலைப் பள்ளிகள் என மொத்தம் 234 பள்ளிகள் உள்ளன. இப்பள்ளிகளில் நேற்று 9, 11-ம் வகுப்பு மாணவர்களுக்கு வகுப்புகள் தொடங்கின.

இதேபோல் செங்கை மாவட்டத்தில் 579 பள்ளிகள், திருவள்ளூர் மாவட்டத்தில் 113 அரசு மேல்நிலைப்பள்ளிகள்,149 அரசு உயர்நிலைப் பள்ளிகள், 332 மெட்ரிக்குலேஷன் பள்ளிகள், 93 சிபிஎஸ்இ பள்ளிகள் உட்பட 754 பள்ளிகளில் 9 மற்றும் 11-ம் வகுப்பு மாணவர்களுக்கு வகுப்புகள் நேற்று தொடங்கின. இதில் பெரும்பாலான மாணவர்கள் பள்ளிக்கு வந்திருந்தனர்.

இந்த 3 மாவட்டங்களிலும் உள்ள கலை, அறிவியல் கல்லூரிகளில் முதலாம் ஆண்டு, 2-ம் ஆண்டு மாணவர்களுக்கு வகுப்புகள் நேற்று தொடங்கின. மாணவர்களுக்கு உடல் வெப்பநிலை பரிசோதனை செய்யப்பட்டு, வகுப்பு களுக்கு அனுமதிக்கப்பட்டனர்.