தந்தையை கொன்ற மகன் கைது

திருச்சி விமானநிலையம் அழகர் தெருவைச் சேர்ந்தவர் நந்தகோபால் (81). ஓய்வுபெற்ற பெல் ஊழியரான இவருக்கு 4 மகன்கள், 2 மகள்கள் உள்ளனர். திருமணமாகாத 4-வது மகன் பிரபோத சந்திரனுடன்(46) நந்தகோபால் வசித்து வந்தார்.

இந்நிலையில் தந்தை, மகன் இடையே நேற்று முன்தினம் இரவு தகராறு ஏற்பட்டது. அப்போது பிரபோத சந்திரன் தாக்கியதில் தலையில் படுகாயமடைந்த நந்தகோபால் அந்த இடத்திலேயே இறந்தார்.

இதுகுறித்து நேற்று காலை தகவலறிந்த விமானநிலைய காவல் ஆய்வாளர் பெரியசாமி மற்றும் போலீஸார் அங்குசென்று உடலைக் கைப்பற்றி பிரேத பரிசோதனைக்காக திருச்சி அரசு மருத்துவமனைக்கு அனுப்பி வைத்தனர். பின்னர் இதுகுறித்து வழக்கு பதிவு செய்து பிரபோத சந்திரனை கைது செய்தனர். சொத்து பாகப்பிரிவினை தொடர்பான பிரச்சினையில் நந்தகோபால் கொலை செய்யப்பட்டிருக்கலாம் எனவும், இதுதொடர்பாக விசாரித்து வருவதாகவும் போலீஸார் தெரிவித்தனர்.