பருத்தியில் விதைப்பண்ணை அமைக்க விவசாயிகளுக்கு வாய்ப்பு :

தூத்துக்குடி விதைச்சான்று உதவிஇயக்குநர் ச.அசோகன் வெளியிட்ட செய்திக்குறிப்பு: பருத்தியில்சான்று விதைகளை வேளாண்மைத் துறையின் பரிந்துரைப்படி விதைப்பு செய்ய வேண்டும். விதைப்பு செய்த 35 நாட்களுக்குள் தூத்துக்குடி விதைச்சான்று உதவி இயக்குநர் அலுவலகத்தில் பதிவு செய்ய வேண்டும். விதைத்த 75 மற்றும் 105-வது நாட்களில் விதைச்சான்று அலுவலரால் விதை பண்ணையின் தரம் நேரில் ஆய்வு செய்யப்படும்.

140-வது நாளில் அறுவடைக்கு பின் பஞ்சு நீக்கப்பட்டு விதைகள் சுத்தம் செய்யப்படும். அதிலிருந்து விதை மாதிரி எடுக்கப்பட்டு விதை பரிசோதனை ஆய்வகத்துக்கு அனுப்பி முளைப்புத் திறன், சுத்தத்தன்மை, ஈரப்பதம் ஆகியவை பரிசோதிக்கப்படும். பரிசோதனையில் தேறும் பட்சத்தில் விதைகள் 4 கிலோ துணிப்பைகளில் நிரப்பப்பட்டு சான்றட்டையானது விதைச்சான்று அலுவலரால் பொருத்தப்படும். பருத்தியில் விதைப்பண்ணை அமைத்து சான்று விதைகள் உற்பத்தி செய்ய விரும்பும் விவசாயிகள், அருகேயுள்ள வட்டார வேளாண் உதவி இயக்குநர் அலுவலக உதவி விதை அலுவலர்கள் அல்லது தனியார் விதை உற்பத்தியாளர்களை அணுகலாம்.