ஆடி திருவிழாவையொட்டி - ராமேசுவரம் ராமநாதசுவாமி கோயிலில் திருக்கல்யாணம் :

ஆடி திருவிழாவை முன்னிட்டு, ராமேசுவரம் ராமநாத சுவாமி கோயிலில் ராமநாதசுவாமி - பர்வதவர்த்தினி அம்பாள் திருக்கல்யாணம் நேற்று முன்தினம் இரவு நடைபெற்றது.

ராமேசுவரம் ராமநாதசுவாமி கோயிலில் இந்த ஆண்டுக்கான ஆடித் திருக்கல்யாண விழா ஆகஸ்ட் 1-ல் தொடங்கி 17 நாட்கள் நடைபெறுகிறது.

12-ம் நாளான திருக்கல்யாண உற்சவ விழாவை முன்னிட்டு வியாழக்கிழமை அதிகாலை 2 மணியளவில் தபசு மண்டகப்படியில் இருந்து பர்வதவர்த்தினி அம்பாள், தோழியருடன் பூப்பல்லக்கில் அருள்பாலித்தார்.

கோயிலின் தெற்கு நந்தவன மண்டபத்தில் அமைக்கப்பட்டிருந்த அலங்கார மேடையில் ராமநாத சுவாமி, பர்வதவர்த்தினி அம்பாள், விநாயகர், முருகன் ஆகியோர் எழுந்தருளினர். தொடர்ந்து ராமநாதசுவாமி, பர்வதவர்த்தினி அம்பாள் திருக்கல்யாணம் நடைபெற்றது.