ஆம்பூர் அருகே சூதாடியதாக 9 பேர் கைது :

ஆம்பூர் அருகே பணம் வைத்து சூதாட்டத்தில் ஈடுபட்ட 9 பேரை காவல் துறையினர் கைது செய்தனர்.

திருப்பத்தூர் மாவட்டம் ஆம்பூர் வட்டம் விண்ணமங்கலம் ரயில்வே மேம்பாலம் அருகே சிலர் பணம் வைத்து சூதாட்டத்தில் ஈடுபட்டு வருவதாக எஸ்.பி., தனிப்படை காவல் துறையினருக்கு தகவல் கிடைத்தது. இதைத்தொடர்ந்து, தனிப்படை காவல் துறையினர் அங்கு சென்று சோதனை நடத்தியபோது தனியாக உள்ள ஒரு வீட்டில் சிலர் சூதாட்டம் ஆடிக்கொண்டிருப்பது தெரியவந்தது.

பின்னர், பணம் வைத்து சூதாட்டத்தில் ஈடுபட்டு வந்த ஆம்பூர் நாச்சியார் குப்பம் பகுதியைச் சேர்ந்த சிவலிங்கம் (48), சாமி (37), பெரியாங்குப்பம் பகுதியைச் சேர்ந்த ராம் (37), விண்ணமங்கலம் பகுதியைச் சேர்ந்த குமரன் (40), கென்னடிகுப்பம் பகுதியைச் சேர்ந்த செல்வம் (52), சுரேஷ்(30), சந்தோஷ்குமார் (30), வில்லியம்(45), மதன்குமார் (33) என 9 பேரை கைது செய்தனர். பின்னர், அவர்களிடம் இருந்து சீட்டுக்கட்டுகள், ரூ.1.80 லட்சம் ரொக்கப்பணம் ஆகியவற்றை காவல் துறையினர் பறிமுதல் செய்து விசாரணை நடத்தி வருகின்றனர்.