மதுரை உணவகங்களில் வியாபாரம் 50 சதவீதம் வீழ்ச்சி : கரோனா அச்சத்தால் சுற்றுலாப் பயணிகள் வர தயக்கம்

வெளியூர் பயணிகள், சுற்றுலாப் பயணிகள் கரோனா அச்சத்தால் வர தயங்குவதால் உணவகங்களில் 50 சதவீத வியாபாரம் வீழ்ச்சியடைந்துள்ளது.

மதுரை மாநகரில் மட்டும் ஆயிரத்துக்கும் மேற்பட்ட உணவகங்கள் உள்ளன. இதில் நேரடியாகவும், மறைமுகமாகவும் 1 லட்சம் பேர் பணிபுரிந்தார்கள். இவர்களில் பெரும்பாலானோர் வடமாநில தொழிலாளர்கள். தற்போது மக்கள் இயல்பு வாழ்க்கைக்கு திரும்பிய நிலை யில் ஹோட்டல்கள் வியாபாரம் மட்டும் இன்னும் பழைய நிலைக்கு திரும்ப வில்லை.

பெரிய ஹோட்டல்களில் 50 சதவீதம் வியாபாரமும், சிறிய ஹோட்டல்களில் 30 முதல் 40 சதவீதம் வியாபாரம் மட்டுமே நடக்கிறது. ஊரடங்கில் தளர்வுகள் அறி விக்கப்பட்டாலும் இன்னும் மக்கள் வெளியூர் பயணங்களை தவிர்த்து வரு வதால் மதுரைக்கு சுற்றுலா, வியாபாரம், மருத்துவம் ரீதியாக வருவோர் எண்ணிக் கையும் குறைந்துவிட்டது.

ஆம்னி பஸ்களும் தினமும் விரல் விட்டு எண்ணக்கூடிய நிலையிலே இயக்கப்படுவதால் பேருந்து நிலைய பகுதியில் உள்ள பெரிய ஹோட்டல்கள் வாடிக்கையாளர்கள் வராமல் வெறிச்சோடி காணப்படுகின்றன.

இதுகுறித்து மதுரை மாவட்ட ஹோட் டல்கள் சங்கத் தலைவரும், டெம்பிள் சிட்டி ஹோட்டல்கள் உரிமையாளர் குமார் கூறுகையில், ‘‘ஹோட்டல்களில் 50 முதல் 60 சதவீதம் மட்டுமே வியாபாரம் நடந்து கொண்டிருக்கிறது. 50 சதவீதம் இருக்கைகளில் மட்டுமே வாடிக்கையாளர்களை அமர வைக்க சொல்லியிருப்பதால் மக்கள் கூட்டமாக சாப்பிட வரும்போது அவர்களை முழு அளவில் ஹோட்டலில் அமர வைக்க முடியவில்லை. கரோனால் சென்ற வெளிமாநில தொழிலாளர்கள் தற்போது வரை முழுமையாக வராததால் வேலைக்கு ஆட்கள் கிடைக்காமல் திண்டாடுகிறோம். அனைத்து வகை உணவுப்பொருட்கள் விலையும் கூடிவிட்டது. ஏற்கெனவே வியாபாரம் குறைந்துவிட்டதால் விலை வாசி உயர்வுக்கு தகுந்தாற்போல் உணவு வகைகளின் விலையை அதிகரிக்க முடி யவில்லை.

ஆனால், ஹோட்டல்கள் மூடிக்கிடந்த ஊரடங்கு காலங்களுக்கு மின்சார கட்டணமும், சொத்து வரியும், ஜிஎஸ்டி வரியும் கேட்கிறார்கள். குறைந்தப்பட்சம் ஹோட்டல் தொழில்களை பாதகாக்க தமிழக அரசு மின்சார கட்டணம், சொத்துவரி, ஜிஎஸ்டி வரியிலிருந்து 6 மாதங்களுக்கு விலக்கு அளிக்க வேண்டும். இவ்வாறு அவர் தெரிவித்தார்.