களக்காட்டில் 18-ல் வாக்குச்சாவடி மகளிர் குழு ஆலோசனைக் கூட்டத்தில் முதல்வர் பங்கேற்பு நெல்லை, தென்காசி மாவட்ட தேர்தல் பிரச்சாரம் விவரம்

திருநெல்வேலி, தென்காசி மாவட்டங்களில் வரும் 18, 19-ம் தேதிகளில் தேர்தல் பிரச்சாரத்தில் ஈடுபடும், தமிழக முதல்வர் பழனிசாமி, களக்காட்டில் அதிமுக சார்பில் நடைபெறும் வாக்குச் சாவடி மகளிர் குழு ஆலோசனைக் கூட்டத்தில் பங்கேற்கிறார்.

தமிழகத்தில் பல்வேறு மாவட்டங்களில் தேர்தல் பிரச்சாரத்தில் ஈடுபட்டுள்ள தமிழக முதல்வர் வரும் 18, 19-ம் தேதிகளில் திருநெல்வேலி, தென்காசி மாவட்டங்களில் பிரச்சாரம் மேற்கொள்கிறார். வரும் 18-ம் தேதி காலை 10 மணிக்கு வள்ளியூர் பழைய பேருந்து நிலையம் காமராஜர் சிலை அருகே நடைபெறும் பொதுக்கூட்டத்தில் பேசுகிறார். தொடர்ந்து, களக்காடு அருணா திருமண மண்டபத்தில் நடைபெறும் வாக்குச்சாவடி மகளிர் குழு ஆலோசனைக் கூட்டத்திலும், மேலச்செவல் பேரூராட்சி திருமண மண்டபத்தில் நடைபெறும் அதிமுக தகவல் தொழில்நுட்ப பிரிவு மற்றும் இளைஞர், இளம்பெண்கள் பாசறை ஆலோசனைக் கூட்டத்திலும் பங்கேற்கிறார்.

பிற்பகலில் ஆலங்குளம் ஏ.ஜே.மஹாலில் நடைபெறும் தகவல் தொழில்நுட்ப பிரிவு மற்றும் இளைஞர், இளம்பெண்கள் பாசறை ஆலோசனைக் கூட்டத்தில் பங்கேற்கிறார். தொடர்ந்து, பாவூர்சத்திரத்தில் நடைபெறும் பொதுக்கூட்டத்தில் பேசுகிறார். பின்னர், தென்காசி இசக்கி மஹாலில் நடைபெறும் மகளிர் குழு ஆலோசனைக் கூட்டத்தில் பங்கேற்கிறார். அன்று இரவில் குற்றாலத்தில் தங்குகிறார்.

வரும் 19-ம் தேதி காலையில் கடையநல்லூரில் பள்ளிவாசல்முன் நடைபெறும் பொதுக்கூட்டத்தில் பேசுகிறார். பின்னர், புளியங்குடி கண்ணா தியேட்டர் வளாகத்தில் மகளிர் குழு ஆலோசனைக் கூட்டத்திலும், சங்கரன்கோவில் வைஷ்ணவி மஹாலில் நடைபெறும் தகவல் தொழில்நுட்ப பிரிவு மற்றும் இளைஞர், இளம்பெண்கள் பாசறை ஆலோசனைக் கூட்டத்திலும் பங்கேற்கிறார்.