52-வது நினைவு தினம்: அண்ணா சிலைக்கு மாலை அணிவித்து மரியாதை

முன்னாள் முதல்வர் அண்ணாவின் 52-வது நினைவு தினத்தை முன்னிட்டு, அவரது சிலை, படங்களுக்கு நேற்று அதிமுக, திமுக, அமமுக, தேமுதிக உள்ளிட்ட பல்வேறு கட்சியினர் மாலை அணிவித்து, மரியாதை செலுத்தினர்.

அதிமுக திருச்சி புறநகர் தெற்கு மாவட்டம் சார்பில், மணப்பாறையில் உள்ள அண்ணா சிலைக்கு மாவட்டச் செயலாளர் ப.குமார் தலைமையில் முன்னாள் எம்எல்ஏ செ.சின்னச்சாமி, அதிமுக நகரச் செயலாளர் ராமமூர்த்தி உள்ளிட்டோர் மாலை அணிவித்து, மரியாதை செலுத்தினர்.

அதிமுக திருச்சி புறநகர் வடக்கு மாவட்டம் சார்பில், அல்லித்துறையில் உள்ள அண்ணா சிலைக்கு மாவட்டச் செயலாளர் மு.பரஞ்ஜோதி தலைமையில் முன்னாள் அமைச்சர்கள் கு.ப.கிருஷ்ணன், கே.கே.பாலசுப்பிரமணியன் உள்ளிட்டோர் மாலை அணிவித்தனர்.

அதிமுக திருச்சி மாநகர் மாவட்டம் சார்பில், சிந்தாமணி பகுதியில் உள்ள அண்ணா சிலைக்கு எம்ஜிஆர் மன்ற மாவட்டச் செயலாளர் ராஜ்குமார் தலைமையில் முன்னாள் அமைச்சர் நல்லுசாமி, ஜவஹர்லால் நேரு உள்ளிட்டோர் மாலை அணிவித்தனர்.

திமுக திருச்சி மத்திய மாவட்டம் சார்பில், சிந்தாமணி பகுதியில் உள்ள அண்ணா சிலைக்கு கட்சியின் முதன்மைச் செயலாளர் கே.என்.நேரு எம்எல்ஏ தலைமையில் மத்திய மாவட்டப் பொறுப்பாளர் வைரமணி, மாநகரச் செயலாளர் அன்பழகன் உள்ளிட்டோர் மாலை அணிவித்து, மரியாதை செலுத்தினர்.

திமுக தெற்கு மாவட்டம் சார்பில் மாவட்டப் பொறுப்பாளர் அன்பில் மகேஷ் பொய்யாமொழி எம்எல்ஏ தலைமையில் முன்னாள் எம்எல்ஏ கே.என்.சேகரன், பகுதிச் செயலாளர் மதிவாணன் உள்ளிட்டோர் மாலை அணிவித்தனர்.

இதேபோல, அமமுக மாவட்ட அவைத் தலைவர் சாத்தனூர் ராமலிங்கம், தி.க மாவட்டத் தலைவர் ஆரோக்கியராஜ், மதிமுக மாவட்டப் பொருளாளர் புலவர் தியாகராஜன் உள்ளிட்டோரும் சிந்தாமணி பகுதியில் உள்ள அண்ணா சிலைக்கு மாலை அணிவித்து, மரியாதை செலுத்தினர்.

அரியலூர் பேருந்து நிலையம் அருகேயுள்ள அண்ணா சிலைக்கு அதிமுக சார்பில் நகரச் செயலாளர் செந்தில் தலைமையிலும், திமுக சார்பில் நகரச் செயலாளர் முருகேசன் தலைமையிலும், அமமுக சார்பில் மாவட்டச் செயலாளர் துரை.மணிவேல் தலைமையிலும், தேமுதிக கட்சி அலுவலகத்தில் வைக்கப்பட்டிருந்த அண்ணாவின் படத்துக்கு அக்கட்சியின் மாவட்டச் செயலாளர் ராம.ஜெயவேல் தலைமையிலும் மாலை அணிவித்து, மரியாதை செலுத்தப்பட்டது.

கரூர் வெங்கமேட்டில் உள்ள அண்ணா சிலைக்கு அதிமுக சார்பில் கரூர் வடக்கு நகரச் செயலாளர் எம்.பாண்டியன் தலைமையிலும், திமுக சார்பில் வடக்கு நகரச் செயலாளர் கணேசன் தலைமையிலும் மாலை அணிவித்து, மரியாதை செலுத்தப்பட்டது.

கரூர் பேருந்து நிலைய ரவுண்டானாவில் உள்ள அண்ணா சிலைக்கு திமுக சார்பில் மாவட்ட பொறுப்பாளர் வி.செந்தில்பாலாஜி எம்எல்ஏ தலைமையில் மாலை அணிவிக்கப்பட்டது.

புதுக்கோட்டை காந்தி பூங்கா அருகே உள்ள அண்ணா சிலைக்கு அதிமுக சார்பில் நகரச் செயலாளர் க.பாஸ்கர் தலைமையிலும், திமுக சார்பில் நகரச் செயலாளர் கே.நைனாமுகமது தலைமையிலும் மாலை அணிவித்து, மரியாதை செலுத்தப்பட்டது.

காரைக்கால் மாவட்டம் கோட்டுச்சேரியில் உள்ள அண்ணா சிலைக்கு, அதிமுக சார்பில் எம்எல்ஏ கே.ஏ.யு.அசனா உள்ளிட்டோரும், திமுக சார்பில் கட்சியின் அமைப்பாளரும், முன்னாள் அமைச்சருமான ஏ.எம்.எச்.நாஜிம் உள்ளிட்டோரும் மாலை அணிவித்து, மரியாதை செலுத்தினர்.

மேலும் காரைக்காலில் உள்ள திமுகவின் கட்சி அலுவலகமான கலைஞர் அகத்தில் அண்ணா உருவப்படத்துக்கும், அறிஞர் அண்ணா அரசு கலைக் கல்லூரியில் உள்ள அண்ணா சிலைக்கும் திமுகவினர் மாலை அணிவித்தனர்.

திருவாரூர் தெற்கு வீதி சந்திப்பில் உள்ள அண்ணா சிலைக்கு நகரச் செயலாளர் ஆர்டி.மூர்த்தி தலைமையில் அதிமுகவினரும், பூண்டி கலைவாணன் எம்எல்ஏ தலைமையில் திமுகவினரும் மாலை அணிவித்தனர். மன்னார்குடி ருக்மணி பாளையம் அண்ணா சிலைக்கு சிவா.ராஜமாணிக்கம் தலைமையில் அதிமுகவினரும், மன்னை சோழராஜன், வீராகணேசன் ஆகியோர் தலைமையில் திமுகவினரும் மாலை அணிவித்தனர்.