சேலம் அரியானூர் மேம்பாலம் பணி 90% நிறைவு டிசம்பரில் மக்கள் பயன்பாட்டுக்கு திறக்க வாய்ப்பு

சேலம் அரியானூரில் சேலம்- கோவை இடையிலான 4 வழிச்சாலையில் கட்டப்பட்டு வரும் மேம்பாலப் பணிகள் 90 சதவீதம் நிறைவடைந்த நிலையில், டிசம்பரில் பொதுமக்கள் பயன்பாட்டுக்கு மேம்பாலம் திறக்க வாய்ப்புள்ளது.

சேலம்- கொச்சி தேசிய நெடுஞ்சாலையில் உள்ள சேலம்-கோவை இடையிலான 4 வழிச்சாலையில் தினமும் ஆயிரக்கணக்கான வாகனங்கள் சென்று வருகின்றன. குறிப்பாக, கொச்சி- கோவை- சேலம்- பெங்களூரு என முக்கிய நகரங்களை இணைக்கும் சாலை என்பதால், நாட்டின் அதி முக்கியத்துவம் வாய்ந்த சாலைகளில் ஒன்றாக இது உள்ளது.

இச்சாலையையொட்டி, சேலம் அடுத்த அரியானூர் மற்றும் மகுடஞ்சாவடி ஆகிய இரு கிராமங்கள் அமைந்துள்ளன. இவ்விரு கிராம மக்களும் 4 வழிச்சாலையின் குறுக்கே கடந்து செல்ல பாதுகாப்பான வழி இல்லை. எனவே, சாலையின் குறுக்கே நடந்து செல்பவர்கள், வாகனங்களில் செல்பவர்கள் அடிக்கடி விபத்தில் சிக்குவதும், பலர் உயிரிழப்பதும் தொடர் கதையாக இருந்தது. இந்நிலையில், கடந்த 2019-ம் ஆண்டு ஜனவரியில் அரியானூர் மற்றும் மகுடஞ்சாவடியில் மேம்பாலம் கட்டும் பணிகள் தொடங்கப்பட்டது. இதில், அரியானூர் மேம்பாலப் பணி 90 சதவீதம் நிறைவடைந்துள்ளது.

இதுதொடர்பாக நெடுஞ்சாலைத் துறை அதிகாரிகள் கூறும்போது, “அரியானூர் மேம்பாலம் 37 மீட்டர் அகலம் சுமார் 1 கிமீ நீளமும் கொண்டது. இப்பாலப் பணி 90 சதவீதம் நிறைவடைந்துள்ளது. பாலத்தில் இறங்கு தளம் அமைக்கும் பணி முடிவுறும் தருவாயில் உள்ளது. எனவே, பணிகள் அனைத்தும் முடிவுற்று, டிசம்பருக்குள் மேம்பாலம் பொதுமக்கள் பயன்பாட்டுக்குத் திறக்க வாய்ப்புள்ளது” என்றனர்.