லாரி மீது கார் மோதி பெண்கள் உட்பட 5 பேர் உயிரிழப்பு

அருப்புகோட்டையை சேர்ந்த வேல்பாண்டியன் தனது குடும்பத்தினருடன் சென்னைக்கு வந்துவிட்டு நேற்று அதிகாலை காரில் அருப்புக்கோட்டைக்கு திரும்பிக் கொண்டிருந்தார்.

திண்டிவனத்தை அடுத்த கன்னிகாபுரம் அருகே காலை 5 மணிக்கு வந்தபோது டிரைவரின் கட்டுப்பாட்டை இழந்த கார் முன்னால் சென்ற கன்டெய்னர் லாரி மீது மோதியது. இதில் காரில் பயணம் செய்த அருப்புக்கோட்டை முருகேசன் மகன் கவுதம், முருகேசன் மனைவி சுப்புலட்சுமி(50) மற்றும் வேல்பாண்டியன் (37) ஆகிய 3 பேரும் சம்பவ இடத்திலேயே இறந்தனர்.

முருகேசன், முத்து மனைவி பேச்சியம்மாள், சேகர் மனைவி ஜெயந்தி, வேல்பாண்டியன் மனைவி லட்சுமிபிரியா வேல்பாண்டியன் குழந்தைகள் கமலினி அருள்சுனை யாழினி ஆகிய 6 பேரும் பலத்த காயமடைந்தனர்.

இவர்களில் முண்டியம்பாக்கம் அரசு மருத்துவமனையில் அனுமதிக்கப்பட்ட ஜெயந்தி நேற்று முற்பகலும் மாலையில் பேச்சியம்மாளும் உயிரிழந்தனர். மயிலம் போலீஸார் லாரி டிரைவரை கைது செய்து விசாரிக்கின்றனர்.