சர்வதேச இளைஞர் தினம் - முதல்வர் ஸ்டாலின் வாழ்த்து :

சர்வதேச இளைஞர் தினம் மற்றும் தேசிய நூலக தினம் நேற்று (ஆக.12) கொண்டாடப்பட்டது. இதையொட்டி சமூக வலைதளத்தில் முதல்வர் மு.க.ஸ்டாலின் நேற்று வெளியிட்ட வாழ்த்துச் செய்தியில், ‘‘மனித குலத்தின் நம்பிக்கையான இளைய சமுதாயத்தை ஊக்கப்படுத்தும், சர்வதேச இளைஞர் தினம்இன்று. இளைஞர்களுக்குத் தேவையான உறுதுணையையும், அவர்களின் சிறகுகள் விரிவதற்கான சூழலையும் உருவாக்கித் தரும் அரசாக திமுக அரசு என்றென்றும் துணை நிற்கும். இளைஞர் எழுச்சியே நாட்டின் வளர்ச்சி’’ என்று தெரிவித்துள்ளார்.

தேசிய நூலக தினம் வாழ்த்து

தேசிய நூலக தின வாழ்த்துச் செய்தியில், ‘‘தேசிய நூலக நாள் இன்று. புத்துலக கனவுக்கு வழிகாட்டுபவை புத்தகங்களே, அதனால்தான் மறைந்த முன்னாள் முதல்வர் கருணாநிதி, சென்னையில் அண்ணா நூற்றாண்டு நூலகம் அமைத்தார். பொன்னாடைகள், பூங்கொத்துகள் தவிர்த்து புத்தகங்களை வழங்கும்படி நான் கேட்டுக் கொண்டதும் அவர் வழியில்தான். வாசிப்பு நமது சுவாசிப்பாகட்டும்’’ என்று தெரிவித்துள்ளார்.