திருமண உதவி திட்டத்துக்காக 1.22 லட்சம் தங்க நாணயங்கள் ரூ.489 கோடியில் கொள்முதல் சமூகநலத் துறை அதிகாரிகள் தகவல்

ஏழை பெண்களின் திருமணத்துக்காக தமிழக சமூகநலத் துறைமூலம் 5 வகையான திருமணஉதவி திட்டங்கள் செயல்படுத்தப்பட்டு வருகின்றன. இத்திட்டங்களின் கீழ் விண்ணப்பிக்கும் ஏழை பெண்களுக்கு தலா 8 கிராம்தங்க நாணயம் மற்றும் கல்வி தகுதிக்கு ஏற்ப ரூ.25 ஆயிரம் முதல் ரூ.50 ஆயிரம் வரை நிதி உதவி வழங்கப்பட்டு வருகிறது.

இத்திட்டத்தின் கீழ் ஆண்டுதோறும் 1 லட்சத்துக்கும் மேற்பட்ட விண்ணப்பங்கள் சமர்ப்பிக்கப்படுகின்றன. அவற்றை ஆய்வுசெய்து, தகுதியான பயனாளிகளுக்கு பதிவு மூப்பு அடிப்படையில் திருமண உதவித் தொகைவழங்கப்படுகிறது. இதனால், ஆயிரக்கணக்கான பயனாளிகளுக்கு 2 ஆண்டுகளுக்கு மேலாக திருமண உதவி தொகை கிடைக்காமல் தாமதம் ஏற்பட்டு வருகிறது.

இந்நிலையில், விண்ணப்பித்து காத்திருக்கும் பயனாளிகளுக்கு திருமண உதவி தொகையை விரைந்து வழங்க நடவடிக்கை எடுக்கப்பட்டுள்ளது.

இதுகுறித்து சமூகநலத் துறை அதிகாரிகள் கூறியதாவது:

நீண்டகாலமாக விண்ணப்பித்து காத்திருக்கும் பெண்களுக்கு திருமண உதவி தொகையை விரைந்து வழங்க நடவடிக்கை எடுக்குமாறு மாவட்ட அதிகாரிகளுக்கு ஏற்கெனவே அறிவுறுத்தப்பட்டுள்ளது.

இதன் தொடர்ச்சியாக, திருமண உதவி திட்டத்தின் கீழ் வழங்குவதற்காக ரூ.489.32 கோடிமதிப்பிலான 1 லட்சத்து 22 ஆயிரத்து 330 தங்க நாணயங்களை கொள்முதல் செய்ய நடவடிக்கை எடுத்து வருகிறோம். விரைவில் அனைத்து பயனாளிகளுக்கும் திருமண உதவி தொகை வழங்கப்படும்.

இவ்வாறு அவர்கள் கூறினர்.