விருதுநகர் - செங்கோட்டை இடையே நாளை சோதனை ஓட்டம்

சிவகாசி: விருதுநகர் - தென்காசி இடையே அகல ரயில் பாதை மின்மயமாக்கல் பணி நிறைவடைந்த நிலையில் நாளை (மார்ச் 29) மின்சார ரயில் இன்ஜின் சோதனை ஓட்டம் நடைபெறும் என ரயில்வே கட்டமைப்புத் துறை அதிகாரிகள் தெரிவித்தனர்.

மதுரை ரயில்வே கோட்டத்தில் விருதுநகர் - தென்காசி, திருநெல்வேலி - தென்காசி, தென்காசி - செங்கோட்டை இடையிலான அகல ரயில் பாதை மின்மயமாக்கப்படும் என 2020-ம் ஆண்டு அறிவிக்கப்பட்டது.

இந்நிலையில் திருநெல்வேலி - தென்காசி இடையே மின்மயமாக்கல் பணி முடிந்து, கடந்த 13-ம் தேதி மின்சார இன்ஜின் சோதனை ஓட்டம் நடைபெற்றது. விருதுநகர் - தென்காசி, தென்காசி - செங்கோட்டை இடையே கடந்தஓராண்டாக நடந்த மின்மயமாக்கல் பணி தற்போது 100 சதவீதம் நிறைவடைந்து விட்டது.

விருதுநகர் - செங்கோட்டை அகல ரயில் பாதையில் உள்ள நூற்றுக்கும் மேற்பட்ட ரயில்வே கிராஸிங்குகளில் வாகனங்கள் தண்டவாளத்தை கடக்கும்போது மின் கம்பிகளில் உரசாமல் இருக்கஉயர தடுப்புகள் அமைக்கப்பட்டுள்ளன. அனைத்து பணிகளும் முடிந்த நிலையில் விருதுநகர் - செங்கோட்டை இடையே நாளை (மார்ச் 29) மின்சார இன்ஜின் சோதனை ஓட்டம் நடைபெறும் என ரயில்வே கட்டமைப்புத்துறை அதிகாரிகள் தெரிவித்தனர்.

இதுகுறித்து மேலும் அவர்கள் கூறுகையில், ஏப்ரல் 8-ம் தேதி செங்கோட்டை - தாம்பரம் இடையே திருநெல்வேலி வழியாக வாரம் 3 நாட்கள் இயங்கும் சிறப்பு ரயிலை பிரதமர் தொடங்கி வைக்க இருக்கிறார். அதற்குள் அனைத்து மின்மயமாக்கல் பணிகளையும் முடித்து நாளை சோதனை ஓட் டம் நடத்துவதற்கான பணிகள் நடக்கின்றன என்றனர்.