சென்னை | ஆட்டோ குறைந்தபட்ச கட்டணத்தை ரூ.50 ஆக உயர்த்த கோரிக்கை

சென்னை: ஆட்டோக்களில் குறைந்தபட்ச கட்டணத்தை ரூ.50 ஆக உயர்த்த வேண்டும் என மனிதநேய தொழிலாளர் சங்க மாநில செயலாளர் அ.சாதிக் பாஷா வலியுறுத்தியுள்ளார்.

இதுகுறித்து அவர் வெளியிட்ட அறிக்கையில் கூறியிருப்பதாவது: ஆட்டோக்களில் குறைந்தபட்ச கட்டணமாக ரூ.25-ம், கி.மீட்டருக்கு ரூ.12-ம் தமிழக அரசின் சார்பில் 2013-ம் ஆண்டு நிர்ணயிக்கப்பட்டது. அப்போதைய பெட்ரோல் விலை ரூ.60.50.

ஆனால், தற்போது பெட்ரோல் விலை ரூ100.19 ஆக உயர்ந்துள்ளது. ஆட்டோவை ஆண்டுதோறும் புதுப்பிக்கும் எஃப்சி கட்டணம், 2013-ல் ரூ.225 ஆக இருந்தது. இன்று ரூ.625 ஆக உயர்ந்துள்ளது.

அரசு போக்குவரத்துக்கழக பேருந்து கட்டணம்கூட 2013-க்கு பின்னர் 2 முறை உயர்த்தப்பட்டுள்ளது. எனவே, ஆட்டோ ஓட்டுநர்களின் வாழ்வாதாரத்தை கவனத்தில் கொண்டு, குறைந்தபட்ச கட்டணத்தை ரூ.50 ஆகவும், கி.மீட்டர் ஒன்றுக்கு ரூ.25 ஆகவும் கட்டணத்தை உயர்த்தி தமிழக அரசு அறிவிக்க வேண்டும். இவ்வாறு அதில் கூறப்பட்டுள்ளது.