2011-ல் தேர்வானவர்களின் பட்டியலை 2022-ம் ஆண்டு அரசிதழில் வெளியிட்ட தமிழக தேர்தல் ஆணையம்

சென்னை: நகராட்சிகளில் உள்ள பல்வேறு குழுக்களுக்கு 2011-ம் ஆண்டு தேர்வு செய்யப்பட்டவர்களின் பட்டியலை தமிழக அரசிதழில் 2022-ம் ஆண்டு வெளியிட்டுள்ளது மாநில தேர்தல் ஆணையம்.

தமிழகத்தில் நகர்புற உள்ளாட்சி அமைப்புகளில் பல்வேறு நிலைக் குழுக்கள் உள்ளன. உள்ளாட்சி அமைப்புகளுக்கான உறுப்பினர்கள் தேர்வு செய்யப்பட்ட பிறகு இந்த நிலைக் குழுக்களுக்கான தேர்தல் நடைபெறும். இந்நிலையில், 2011-ம் ஆண்டு நடைபெற்ற தேர்தலில் தேர்வு செய்யப்பட்ட உறுப்பினர்களின் பட்டியலை மாநில தேர்தல் ஆணையம் தற்போது அரசிதழில் வெளியிட்டுள்ளது.

இதன்படி 21.11.2011-ல் நகராட்சிகளில் நடைபெற்ற மறைமுக தேர்தலில் வரி விதிப்பு மேல்முறையீட்டுக் குழு, ஒப்பந்தக் குழு, நியமன குழுவிற்கு தேர்வு செய்யப்பட்ட உறுப்பினர்களின் பட்டியல் கடந்த செப்டம்பர் 7 தேதியிட்ட தமிழக அரசிதழில் மாநில தேர்தல் ஆணையம் வெளியிட்டுள்ளது.

2011-ம் ஆண்டுக்கு பிறகு சமீபத்தில்தான் நகர்புற உள்ளாட்சி தேர்தல் நடைபெற்று புதிய உறுப்பினர்கள் மற்றும் நிலைக் குழு உறுப்பினர்கள் தேர்வு செய்யப்பட்டனர் என்பது குறிப்பிடத்தக்கது.