குற்றாலம் அருவிகளில் டிச.20 முதல் குளிக்க அனுமதி

குற்றாலம் அருவிகளில் பொதுமக்கள் குளிக்க டிசம்பர் 20-ம்தேதி முதல் அனுமதி அளிக்கப்பட்டுஉள்ளது.

கரோனா பரவல் காரணமாக கடந்த ஆண்டு 9 மாதங்களுக்கும் மேல் குற்றாலம் அருவிகளில் குளிக்க தடை விதிக்கப்பட்டது. அதன்பின் தொற்று குறைந்ததால், கடந்த ஆண்டு டிசம்பர் 15-ம் தேதி முதல் அருவிகளில் குளிக்க மக்கள் அனுமதிக்கப்பட்டனர்.

ஆனால், கரோனா இரண்டாம் அலை காரணமாக கடந்த மே மாதம் முதல் குற்றாலம் அருவிகளில் குளிக்க மீண்டும் தடை விதிக்கப்பட்டது. சுமார் 7 மாதங்களுக்கு பின்னர், வரும் 20-ம் தேதி முதல் அருவிகளில் குளிக்க அனுமதி அளிக்கப்பட்டுள்ளது.

தினமும் காலை 6 மணி முதல் மாலை 6 மணி வரை மட்டும் அருவிகளில் குளிக்கலாம். பிரதான அருவியில் ஆண்கள் பகுதியில் ஒரு நேரத்தில் 10 பேர், பெண்கள் பகுதியில் ஒரு நேரத்தில் 6 பேர் மட்டுமே அனுமதிக்கப்படுவர். ஐந்தருவியில் ஆண்கள் மற்றும் பெண்கள் பகுதியில் தலா 10 பேர், பழைய குற்றாலம் அருவியில் ஆண்கள் பகுதியில் 5 பேர், பெண்கள் பகுதியில் 10 பேர் மட்டுமே அனுமதிக்கப்படுவர் எனத் தெரிவிக்கப்பட்டுள்ளது.

அருவி பகுதிகளின் பாதுகாப்பு, மேற்கொள்ள வேண்டிய முன்னேற்பாடு பணிகள் குறித்து அறிக்கைஅளிக்க, கண்காணிப்பு அலுவலர்களை நியமித்து, தென்காசி மாவட்ட ஆட்சியர் கோபால சுந்தரராஜ் உத்தரவிட்டுள்ளார்.