சில்லறை வழங்கிய சிறுவன்: நெகிழ்ந்துபோன முன்னாள் மேயர்

தேர்தல்களில் வேட்பாளர்கள் வாக்காளர்களுக்கு பணம் கொடுத்து வாக்குகளை வாங்குவதை பார்த்திருக்கோம். ஆனால், சைதாப்பேட்டை தொகுதியில் சிறுவன் ஒருவர் பல நாணயங்கள் கொண்ட சுமார் ரூ.500-ஐ திமுக வேட்பாளருக்கு வழங்கினார்.

சென்னை சைதாப்பேட்டை சட்டப்பேரவை தொகுதியில் முன்னாள் மேயர்கள் சைதை துரைசாமி, மா.சுப்பிரமணியன், முன்னாள் அமைச்சர் செந்தமிழன் உள்ளிட்டோர் போட்டியிடுகின்றனர். சென்னையில் போட்டி பலமாக இருக்கும் தொகுதிகளில் ஒன்றாக சைதாப்பேட்டை உள்ளது. இதனால், வேட்பாளர்கள் வீடுகள் தோறும் சென்று மக்களை சந்தித்து வருகின்றனர்.

திமுக வேட்பாளரும், முன்னாள் மேயருமான மா.சுப்பிரமணியன் கடந்த 10 நாட்களாக தினமும் காலை 6 மணிக்கு தொடங்கி மதியம் 11 மணி வரையிலும், மாலை 4 மணிக்கு தொடங்கி இரவு 9 மணி வரையிலும் நடைபயணம் மூலம் வாக்காளர்களின் வீடுகளுக்கு சென்று பிரச்சாரம் மேற்கொண்டு வருகிறார்.

இதற்கிடையே, சைதாப்பேட்டை மார்க்கெட் பகுதியில் மா.சுப்பிரமணியன் நேற்று காலையில் தனது ஆதரவாளர்களுடன் பிரச்சாரம் மேற்கொண்டபோது, அந்த பகுதியை சேர்ந்த சிறுவன் ஒருவர் பல நாணயங்கள் கொண்ட சிறு பெட்டியை வழங்கினார். அதில், ரூ.1 ரூ.2, ரூ.5 நாணயங்கள் என சுமார் ரூ.500 இருந்தது. ‘உங்களுக்கு தான் இந்த பரிசு’ என சிறுவன் வழங்க, புன்னகையோடு வாங்கி மகிழ்ந்த மா.சுப்பிரமணியன், அந்த சிறுவனுக்கு வாழ்த்து தெரிவித்ததோடு, நன்கு படிக்கும்படி அறிவுரை வழங்கினார்.