கேரள மாநிலத்தின் மன்னார்காடு, தேவிகுளத்தில் பெண் வேட்பாளர்களை களமிறக்கிய அதிமுக

கேரளாவில் மன்னார்காடு, தேவிகுளம் ஆகிய 2 தொகுதிகளில் அதிமுக சார்பில் பெண் வேட்பாளர்கள் அறிவிக்கப்பட்டுள்ளனர்.

தமிழகம், புதுச்சேரி, கேரள மாநிலங்களுக்கான சட்டப்பேரவை பொதுத் தேர்தல் ஏப்ரல் 6-ம் தேதி நடைபெறுகிறது. 3 மாநிலங்களிலும் வேட்புமனு தாக்கல் கடந்த 12-ம் தேதி தொடங்கி நடந்து வருகிறது. இத்தேர்தலில் தமிழகம், புதுச்சேரி மட்டுமின்றி, கேரளாவிலும் பாலக்காடு மாவட்டம் மன்னார்காடு, இடுக்கி மாவட்டம் தேவிகுளம் ஆகிய 2 தொகுதிகளில் அதிமுக போட்டியிடுகிறது.

அதிகாரபூர்வ அறிவிப்பு

இந்நிலையில், இந்த 2 தொகுதிகளுக்கான வேட்பாளர்கள் அறிவிக்கப்பட்டுள்ளனர்.

இதுகுறித்து ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் பழனிசாமி வெளியிட்ட அறிவிப்பில், ‘அதிமுக ஆட்சிமன்றக் குழு பரிசீலித்து எடுத்த முடிவின்படி, ஏப்ரல் 6-ம் தேதி நடக்க உள்ள கேரள மாநில சட்டப்பேரவை பொதுத் தேர்தலில் அதிமுகவின் அதிகாரப்பூர்வ வேட்பாளர்களாக, மன்னார்காடு தொகுதியில் பி.நசீமா, தேவிகுளம் தொகுதியில் ஆர்.எம்.தனலட்சுமி ஆகியோர் நிறுத்தப்படுகின்றனர்’ என்று கூறப்பட்டுள்ளது.